येँ महानगरपालिका मेयर विद्यासुन्दर शाक्यं महानगर लागा दुनेया थीथी सार्वजनिक व भिडभाड जुइगु थासय् निःशुल्क खाना नकाच्वंगु ज्यायात पार्टि प्यालेसय् यायेत इनाप यानादीगु दु । थुकि पार्टि प्यालेसय् जुइगु खर्च महानगरं व्यवस्था याइगु वयेकलं न्ह्यथनादिल । मेयर शाक्यं नयेमखंपिंत नकाच्वंपिंत नके मबिल धका बय् बय् जुयाच्वंगु इलय् पत्रकार सम्मेलन यासें वयेकलं स्वनिगलय् सुं नयेमखंकाच्वनेम्वाःगु न्ह्यथनादिल ।
थःगु नांया नितिं वा मेगु स्वार्थया नितिं मखुसा थुकथं धू ब्वइगु थासय् वा हुल जुइगु थासय् मयाःसे व्यवस्थित कथं पार्टि प्यालेसय् यायेत इनाप यानादिल । थुकिया नितिं थःपिंसं नं व्यवस्था यानागु व नकाच्वंपिं स्वयंसेवक व अभियन्तानाप सहलह ब्याकाच्वनागु न्ह्यथनादिल । बल जफतं नकाच्वंपिंत मपनेगु तकं वयेकलं न्ह्यथनादिल ।
येँ राजधानी जूगु व सम्वेदनशील थाय् जूगुलिं थुकिया साैन्दर्ययात तकं ध्यान बीमाःगु वयेकलं न्ह्यथनादिल । खुलामञ्चय् हे नकेमाःगुया धका अडान कायेमाःगु जरुरत मदुगु तकं वयेकलं कनादिल । वयेकलं लकडाउन जूछि येँ महानगरपालिकां ३२ गु वडापाखें नय् मखंपिं, बेरोजगार, अशक्त व असहाययात राहत वितरण यानागु लुमंकादिल । महानगरपालिकां छगु लख ५० द्व स्वयाँ अप्व छेँजःयात राहत वितरण व निगु लख ५० द्व अप्वःयात नकेगु ज्या याःगु न्ह्यथनादिल ।
अथेहे महानगरपालिका दुने च्वनाच्वंपिं ज्या याय् फुपिं व कोभिडया कारण बेरोजगार जूपिंत सामान्य स्वयाँ सामान्य रोजगारी बीगु ज्या तकं यानागु न्ह्यथनादिल । तर सितिकं नय् पल्के थुपिंसं नं वइगु तर ज्या याः धाःसा म्हाः धाइगु अनुभव तकं वयेकलं कनादिल । न्हयेला च्याला थुकथं सितिकं नय् पल्के थुलकि उम्ह मनुखँ गबलें ज्या याना नइ मखु धासें सितिकं जक नकेगु नं निरुत्साहित यायेमाःगु वयेकःया न्ह्यथना दु । थुकिया नितिं कार्यपालिकाया मुँज्यां जीवन निर्वाहया नितिं पारिश्रमिक कार्यविधि, २०७७ हे पारित याना कार्यान्वयनय् हया कार्यविधिइ इम्त वडा ज्याकु पाखें सार्वजनिक पूर्वाधार विकास, सार्वजनिक पूर्वाधार मर्मत सम्भार, ढल निकास व फुटपाथ व्यवस्थापन, सम्पदा संरक्षण व सौन्दर्यीकरण थेंजाःगु ज्या बीगु न्ह्यथनादिल । श्रम याना नयेफूपिं युवायात श्रमया सम्मानया नितिं प्रेरणा जागृत याकेत, अल्छी जुइमज्यू धाःसें येँयात याना नइपिनि शहर कथं म्हसिकेमाःगु न्ह्यथनादिल ।
सतकय् थुकथं नयेमखँपिं धका क्यना इमि बाखँ मिया हलिमय् ऐतिहासिक व साँस्कृतिक शहर नापं नेपाःया हे म्हसिका धका कयाच्वंगु येँयात कुरुप क्यनेगु व फ्वगिंतयेगु शहर धका हलिमय् म्हसिकेगु कुतः जुयाच्वंगु वयेकलं द्वपं तकं बियादिल । विदेशी आर्थिक ग्वाहालिया नितिं थज्यागु ज्या जुयाच्वंगु जुइफुगु तकं वयेकलं आशंका यानादिल । थुकिंयाना विदेशय् च्वनाच्वंपिं नेपामिपिंसं विदेशीतय् नाप मिखा ल्वाका खँ ल्हाय् फइला धका तकं वयेकलं न्ह्यसः तयादिल ।
0 Comments:
Post a Comment