नेपालं लिम्पियाधुरा नापंया नक्सा सार्वजनिक याःगु इलय् चीनया इसाराय् थुकथंया ज्या याःगु द्वपं ब्यूम्ह भारतीय सेनाध्यक्ष मनोज मुकुन्द नरवणे नेपाःया निन्हुयंकंया भ्रमणय् दु । वयेकः थाैंनिसें नेपाली सेनाया मानार्थ महारथी जुइत्यंगु दु । जंगीअड्डाया अभिलेखकथं भारतीय सेनाध्यक्ष नरवणे नेपाली सेनाया मानार्थ महारथीया सम्मान काइम्ह १८ म्हम्ह मनु खः ।
बुधबार येँय् वम्ह नरवणें थीथी ऐतिहासिक सम्पदा व पशुपतिनाथ नापं कुमारीया दर्शन याःगु खः । भ्रमणया निगुगु दिं थाैं (बिहीबाः) वयेकः शीतलनिवासय् राष्ट्रपति विद्यादेवी भण्डारीपाखें नेपाली सेनाया मानार्थ महारथीया सम्मान कायेत्यंगु खः ।
नेपाली सेनाया कथं सन् १९५० निसें निगु देसं मानार्थ सेना प्रमुखया सम्मान बीगु चलन न्ह्यकाच्वंगु दु । अथेहे राणा प्रधानमन्त्री वीर शमशेरया पालंनिसें थ्व परम्पराया सुरुवात जूगु धाइ । तत्कालीन व्रिटिस इन्डियाया गोर्खा सैनिकयात थःगु मातहतय् ज्या याकेत प्रोत्साहन कथं मानार्थया सम्मान बीगु चलन न्ह्याःगु खः । राणा शासनया इलय् जंगबहादुर, रणदीप नापं गार्खालीयात ‘लाहुर’वनेत निरुत्साहित यायेगु नीति काःगु खः । वीर शमशेरया पालय् धाःसा ब्रिटिस इन्डियां सम्मानया प्रलोभन क्यना लाहुरय् यंकुगु खः । जंगीअड्डाया अभिलेख कथं भारत स्वतन्त्र जुइ न्ह्यः हे नेपाः व भारतया सैनिकदथुइ थवंथवय् देया भ्रमण यायेगु ज्याय् सुरुवात वयेधुंकुगु खः ।
0 Comments:
Post a Comment