‘संघीय लोकतान्त्रिक गणतन्त्र नेपाल’ मच्वःगुलिं संसदीय समितिं सरकारयात सःतल


संसदया राज्य व्यवस्था तथा सुशासन समितिं ‘संघीय लोकतान्त्रिक गणतन्त्र नेपाल’ मच्वयेगु निर्णयबारे सहलह यायेत सरकारयात सःतुगु दु । सभापति शशी श्रेष्ठया कथं समितिया मुँज्या वैगु आइतबाः न्हिनय् १ ता इलय् च्वनि । 

मुँज्यां ‘संघीय लोकतान्त्रिक गणतन्त्र नेपाल’ मच्वयेगु सरकारया निर्णयया विषयलय् सहलह यायेत निमित्त सचिव खगराज बरालयात सःतुगु दु । नेपाल सरकारया मूछ्याञ्जे शंकरदास बैरागीयात कोरोना संक्रमण जूगुलिं बराल निमित्त मू छ्याञ्जेया जिम्मेवारी कःघानाच्वंगु दु । 

वंगु असोज ११ गते च्वंगु मन्त्रिपरिषद बैठकं संघीय लोकतान्त्रिक गणतन्त्र नेपाल मच्वयेगु निर्णय याःगु खः । नेपालीइ ‘संघीय लोकतान्त्रिक गणतन्त्र, नेपाल’ व अंग्रेजीइ ‘फेडरल डेमोक्रेटिक रिपब्लिक अफ नेपाल’ च्वयेमाःगुलिइ ‘नेपाल’ जक च्वयेगु सरकारं निर्णय याःगु खः । 

थ्व निर्णय सत्तारुढ नेकपादुने हे विरोध जूगु खः । अथेहे जनता समाजवादी पार्टीया अध्यक्ष उपेन्द्र यादवं प्रेस नोट पिकाया प्रतिगमनपाखे यंकेगु षड्यन्त्र जूगु टिप्पणी याःगु खः । 

Share on Google Plus

News: Newa News

    छ्याता
    फेसबुक छ्याता