कोरोना जूम्ह छेँ हे मदुसा थःथितिं सी उइ दइगु


कोरोना भाइरस जुया छेँ हे आइसोलेशनय् च्वनाच्वंगु इलय् मन्त धाःसा थःथितिं हे सी उइ दइगु व्यवस्था सरकारं याःगु दु ।

सरकारं ‘कोभिड–१९ या कारणं सीपिनिगु सिम्ह व्यवस्थापन सम्बन्धी संक्षिप्त कार्यविधि’ संशोधन याना छेँ आइसोलेशनय् संक्रमित मदुसा थःथितिं सिम्ह व्यवस्थापन यायेदइगु व्यवस्था यानादिल ।

संशोधित कार्यविधिइ थःथितिं स्थानीय प्रतिनिधि व प्रहरीयात धाःसा सुचं बीमाःगु धयातःगु दु ।

छेँया दुजः, थःतिथि व अन्तिम संस्कारय् ब्वति काइपिंसं तसकं बिचाःयाना अन्त्येष्टि यायेमा । थुकि मस्त व ६० दँ स्वयाँ च्वय् यापिं जोखिम पुचःया मनुत धाःसा ब्वति कायेदइमखु ।

व्यक्तिगत सुरक्षाया सामग्री फिना सिम्हयात ¥याप याना बडी ब्यागय् तयेगु ज्या सम्बन्धित थःथितिं हे यायेमा । आइसोलेशनय् तयातःगु थासं सिम्ह यंकिगु गाडीतक थःथितिं हे यंकेमा । शव बहान मदुगु थासय् सिम्ह मथीगु कथं सिथं यंकेमा ।

अस्पतालय् मदुसा धाःसा सिम्ह व्यवस्थापन जिल्ला कोभिड–१९ संकट व्यवस्थापन केन्द्रं याइ । छेँजःपिंसं ख्वाः स्वय् मन जूसा बडी ब्यागय् तय् न्ह्यः निगु मिटर तापाकं स्वय् फइगु कार्यविधिइ उल्लेख यानातःगु दु ।

कार्यविधिइ कोभिड–१९ पाखें सीपिं धैगु कोभिड–१९ या लक्षण व चिन्ह नापं प्रयोगशालाया आधारय् सम्भावित वा पुष्टि जूगु केश खः धका च्वयातःगु दु ।

संशोधित कार्यविधि असोज २५ गते मन्त्री स्तरीय मुँज्यां स्वीकृत याःगु स्वास्थ्य तथा जनसंख्या मन्त्रालयं न्ह्यथंगु दु ।


Share on Google Plus

News: Newa News

    छ्याता
    फेसबुक छ्याता