राजोपाध्याय समाजया न्हूम्ह नायः संजय शर्मा ल्यल


कौलाथ्व पारु ११४० (२०७७ कार्तिक १) शन्चरबाः

यल / स्वनिगःया आदिवासी द्यःब्रम्हू राजोपाध्यायतय् कुसा संगठन राजोपाध्याय समाजया न्हूम्ह नायकथं कलाकार संजय शर्मा राजोपाध्याययात ल्यःगु दु । वंगु शन्चरबाः क्वचाःगु समाजया न्हय्क्वःगु दँमुँज्या व स्वक्वःगु तःमुँज्यां वय्कःयात समाजया न्हूम्ह नायकय् निर्विरोध ल्यःगु खः ।

व हे कथं स्वक्वःगु तःमुँज्यां ल्यःगु न्हूगु ज्यासना पुचलय् न्वकू रचना शर्मा राजोपाध्याय च्वनादीगु दुसा मू छ्यान्जेय् पत्रकार बिराजकाजी राजोपाध्याययात ल्यःगु दु । व हे कथं छ्यान्जेय् वन्दना राजोपाध्याय, दांभरिं उद्धव आचार्य राजोपाध्याय, ल्यू दांभरिंलय् चेतनादेवी शर्मा राजोपाध्याय च्वनादीगु दु ।


१३ म्ह दुजः दुथ्याःगु ज्यासना पुचःया मू दुजः पदय् विजय शर्मा राजोपाध्याय, विरु सुवेदी राजोपाध्याय, सुजित राजोपाध्याय, श्रीमणी राज शर्मा राजोपाध्याय, रक्षण राजोपाध्याय, महेश बाबु शर्मा राजोपाध्याय व गिरिश शर्मा राजोपाध्याय दी ।

नायः ल्ययेधुंकाः नुगः खँ तयेगु झ्वलय् न्हूम्ह नायः संजयं समाजयात छधी छप्पँ दयेकाः समाजया सर्वाङ्गिण विकासया लागिं निरन्तर न्ह्यानाच्वनेगु प्रतिवद्धता प्वंकादिल ।

वयां न्ह्यः तःमुँज्याया उद्घाटन सत्रय् नेवाः देय् दबूया नायः नरेश ताम्रकारं राजोपाध्याय खँग्वलं स्वनिगःया नेवाःतय् गुरु पुरोहित कथं म्हसिका दुपिं द्यःब्रम्हूतय्गु विशिष्ट पहिचान कुबियाच्वंगु धासें सकल द्यःब्रम्हूतय्सं मेमेगु थर च्वःसां राजोपाध्याय नं तयेमाःगु खँय् बः बियादिल ।


Share on Google Plus

News: Newa News

    छ्याता
    फेसबुक छ्याता