ह्वाँय् ह्वाँय् ख्वःगुलिं पुलांगु चकलेटय् न्हू मिति तिकाः म्यूपिंत त्वतल

म्याद सिधःगु पौष्टिक पदार्थ व चकलेटया खाद्य वस्तुइ न्हूगु उपभोग्य मिति तःगु द्वपनय् ज्वंपिं ७ म्हसित वाणिज्य विभागं सामान्य तारेखय् त्वःतुगु दु । बिहीबाः कलंकी व बाफलं ज्वंपिं वितरक कम्पनीया सञ्चालक पुष्पादेवी अग्रवासनापं ७ म्हसित विभागं त्याःसा धरौटी कथं शुक्रबाः सुटुक्क हिरासत मुक्त याःगु दु । 

वाणिज्य आपूर्ति तथा उपभोक्ता संरक्षण विभागया महानिर्देशक नेत्रप्रसाद सुवेदीं पुष्पादेवी मफया च्वंगु व ह्वाँय् ह्वाँय् ख्वया च्वंगुलिं त्वःतागु न्ह्यथंगु दु । 

महानिर्देशक सुवेदीया कथं पुष्पादेवीया थःथितिं जग्गाया लालपूर्जा विभागय् लःल्हाःगु दु । आइतबाः १ करोड धरौटी बीगु सर्त कथं मू आरोपी पुष्पादेवीनापं ६ म्हसित सामान्य तारेखय् त्वःतुगु न्ह्यथंगु दु । ७ म्हमध्ये भारतीय नागरिक रोनक बोथ्रा धाःसा प्रहरी हिरासतय् हे दु । 

इम्सं ओरियो बिस्कुट, स्निकर्स, मार्स चकलेट, बर्नभिटा, प्रिङ्गल्स व युनिलिभरया यक्व धैथें उत्पादनय् न्हूगु लेभल तयाच्वंगु लूगु खः । सिधःगु उपभोग्य मिति हुया न्हूगु मिति तयाच्वंगु अवस्थाय् महानगरीय प्रहरी अपराध महाशाखां रंगेहात ज्वना बिहीबाः वाणिज्य विभागयात जिम्मा ब्यूगु खः । 

हिरासतमुक्त जूपिं झापा चन्द्रगढी छेँ दुम्ह पुष्पादेवी अग्रवाल, रौतहटया गौर नगरपालिका–३ मजकुटिया छेँ व आः येँया बल्खुइ च्वनिम्ह मौजिलाल ठाकुरया काय् पिं मुन्ना ठाकुर व पप्पु कुमार ठाकुर, महोत्तरीया बनरा छेँ दुम्ह व आः येँया कपुरधारा च्वनिम्ह आसाराम सिंहया काय् श्याम प्रसाद सिंह, धादिङया गल्छी–३ कल्लेरी छेँ दुम्ह येँया कुलेश्वर च्वनिम्ह कान्छा वयलकोटीया काय् राम बहादुर बयलकोटी, धादिङया निलकण्ठ नगरपालिका–६ जल्केनी छेँ जुया येँया कलंकी च्वनिम्ह बुदे उपरकोटीया काय् सिताराम उपरकोटी व धादिङको सिद्धलेख गाउँपालिका–४ भेडावारी छेँ दुम्ह येँया बाफल च्वनिम्ह गुन्ज बहादुर थापामगरया काय् दिलिप थापामगर हिरासतमुक्त जूगु खः । भारत राजस्थान विकानेर श्रीडुङगरगढ ग्राम वडा नं. १३ छेँ दुम्ह येँया बाफल च्वनिम्ह मागोलाल बोथ्राया काय् ३५ दँ दुम्ह रोनक बोथ्रा धाःसा हिरासतय् हे दु ।

Share on Google Plus

News: Anonymous

    छ्याता
    फेसबुक छ्याता