बुद्ध भजन प्रतिभा मालेज्याय् अगिना व सुशील न्हाप



अनलागा अष्टमी ११४० (२०७७/०६/२४) शनिबाः

येँ, बुद्ध भजनया माध्यमं अनलाइन प्रतिभा मालेज्याया त्याःपिं घोषणा जूगु दु । बुद्ध शान्त पार्क अनलाइनं ग्वसाः ग्वःगु बुद्ध भजनया माध्यमं अनलाईन प्रतिभा मालेज्याय् नेपालभाषा व नेपाली विधा याना शुक्रबाः व शनिबाः धेंधेंबल्ला जूगु खः ।

नेपालभाषा बुद्ध भजन धेंधेंबल्लाखय् सुशील शाही न्हाप लाःगु खः । अथे हे, मन्जिल शाक्य ल्यू व प्रतिमा बज्राचार्य लियांल्यू लायेत ताःलात ।

त्याकामिपिन्त शहरी विकास राज्यमन्त्री रामवीर मानन्धरं ट्रफि लःल्हानादीगु खःसा उद्योगपति, समाजसेवी धर्मबहादुर शाक्यं दसिपौ लःल्हानादिल । न्हाप लाःम्ह शाहीयात समाजसेवी शाक्यं व्यक्तिगत थःगुपाखें ५द्वः तका तना बियादिल ।

नेपालभाषा विधाय् मुक्कं सच्छि व ४० म्हेसिया ब्वति दुगु खः । अनलाईन माध्यमं थीथी चरण पुलावयाः लिपांम्ह १० म्ह कासामि दथुइया लिपांगु धेंधें बल्लाखं ३ म्ह त्याकामि ल्यःगु खः । 

नेपालभाषा बुद्ध भजन विधा अन्तर्गत दक्कले आपाः एसएमएस मत चूलाकूपिं श्रृजना बज्राचार्य व अनु श्रेष्ठया लिसें युट्युबय् दक्कले आपाः भ्यूज वःपिं मिनर्वा शाक्य व बबिता बज्राचार्ययात नं सिरपाः लःल्हाःगु खः ।



अथेहे नेपाली बुद्ध भजन विधाय् अगिना तण्डुकार न्हाप लात सा रेशम थापा ल्यू व कल्पना श्रेष्ठ लियांल्यू लात ।

त्याकामिपिन्त शहरी विकास राज्यमन्त्री मानन्धरं ट्रफि लःल्हानादिलसा प्रा. सुवर्ण शाक्यं दसिपौ लःल्हानादिल ।

नेपाली बुद्ध भजन अन्तर्गतया प्रतिभा मालेज्याय् मुक्कं सच्छिम्हेसिनं ब्वति काःगु खः ।

उगु हे ज्याझ्वलय् कासा ज्वःछि दक्कले आपाः एसएमएस चूलाकूपिं मन्दिरा बज्राचार्य व उर्मिला तुलाधर, युट्युबय् दक्कले आपाः भ्यूज वःपिं बबिता बज्राचार्य व मन्दिरा बज्राचार्ययात नं सिरपाः लःल्हाःगु खः ।

लिसें कासाया दक्कले ज्याथःम्ह कासामि व दक्कले जिथिम्ह कासामिलिसें दक्कले क्वकालिम्ह मचा कासामियात तकं सिरपाः ब्यूगु खः ।

निन्हुया हे धेंधें बल्लाखय् वरिष्ठ संगीतकारद्वय डबल शाक्य व अनिल तुलाधर, वरिष्ठ गायिका रमना श्रेष्ठ, लोककवि राजभाई जकःमि व वरिष्ठ लेखक, निर्देशक पवन जोशी दुथ्याःगु निर्णायक मण्डलं त्याकामि ल्यःगु खः ।

नुगः खँ तयेगु झ्वलय् शहरी विकास राज्यमन्त्री रामवीर मानन्धरं कासाया ग्वसाः खलः बुद्ध शान्त पार्क निर्माण समितिं देवघाटय् दयेकाच्वंगु पार्कया लागिं थम्हं फक्व ग्वाहालि यायेगु प्रतिवद्धता प्वंकादिल । बुद्धया शान्तिया हसना व महान वाणीयात अन्तर्राष्ट्रिय जगतय् प्रचार यायेगु ज्याय् ग्वाहालिया लागिं संघ, प्रदेश व स्थानीय सरकारलिसे थम्हं समन्वय यायेगु राज्यमन्त्री मानन्धरं धयादिल ।

ज्याझ्वलय् वरिष्ठ गायिका रमना श्रेष्ठ, प्रा. सुवर्ण शाक्य नापंया वक्तापिंसं बाैद्ध ख्यलय् धेंधें बल्लाः वा कासा मजुइगु तर ईकथं न्ह्याःवनाः प्रतिभा मालेगु ज्या धाःसा बांलाःगु बिचाः तयादिल ।

बुद्ध शान्त पार्क निर्माण समितिं देवघाटय् ३० रोपनी जग्गाय् १६ फिट तःधिकःम्ह बुद्ध मूर्तिया नापं पञ्चबुद्ध तकं स्थापना यानाः ध्यान कक्षलिसेंया बुद्ध शान्त पार्क दयेकेज्यायात न्ह्याकातःगु दु ।

समितिया नायः शान्तबहादुर शाक्यं सकसिगु ग्वाहालिपाखें हे पार्क दयेकेज्या न्ह्याःवनाच्वंगु धासें थुगु ज्या सुथां लाकेत सकसिनं फुकथं ग्वाहालि यायेत इनाप यानादिल ।


Share on Google Plus

News: Anonymous

    छ्याता
    फेसबुक छ्याता

0 Comments:

Post a Comment