अनलागा अष्टमी ११४० (२०७७ असोज २४) शनिबार
येँ, जागरुक युवा समाजं येँय् प्यक्वःगु खुसी हिदान ज्याझ्वः याःगु दु । समाजं येँ महानगरपालिका २४ वडालिसेया मंकाः ग्वसालय् वंगु शनिबाः येँया इतुम्बहालय् हिदान ज्याझ्वः याःगु खः । ब्लड डोनर्स एशोसिएसन नेपाल (ब्लोदान) या आह्वानय् समाजं हिदान ज्याझ्वः याःगु खः ।
उगु हिदान ज्याझ्वलय् मुक्कं २१म्हेसिनं हिदान याःगु खः ।
लिपांगु इलय् जागरुक युवा समाज विशेष यानाः येँया पुलांगु वस्तीइ फुटपाथ पसः चीकेगु अभियानय् सक्रिय जुयावःगु दु । आः महामारीया इलय् सुं नं विरामीं हिया अभावया हुनिं ज्यान मवनेमा धकाः समाजं हिदानयात नं प्राथमिकताय् तयाः हिदान ज्याझ्वः यानावयागु समाजया सह सचिव लिसें हिदान ज्याझ्वःया कजि राजीव श्रेष्ठं धयादिल ।
महामारीया अवस्थाय् हिया माग अप्वःगु व मजिमगाःगु ज्याबाहेक सर्वसाधारण मनूत काचाक्क छेँय् नं पिहां मवइगु अवस्थाय् हिया अभाव जुइगु सम्भावना दूगु सह सचिव श्रेष्ठं न्ह्यथनादिल ।
सामाजिक दुरी कायम यासें स्वास्थ्य सुरक्षा मापदण्डयात लिनाः हिदान ज्याझ्वः यानागु वयेकलं धयादिल । ज्याझ्वःयात सुरक्षित ढङ्गं क्वचायेकेत ब्लोदानया लागिं व्यक्तिगत सुरक्षा उपकरण (पिपिई), मास्क व सेनिटाइजर लिसेंया सुरक्षा ज्वलंत येँ महानगरपालिका २४ वडाया वडाअध्यक्ष बालकृष्ण श्रेष्ठं ग्वाहालि यानादीगु ग्वसाः खलकं जानकारी ब्यूगु दु ।
0 Comments:
Post a Comment