येँ महानगरपालिकां तिलगंगाय् स्वंगु विद्युतीय शवदाहगृह देकीगु, खुला दुने सञ्चालनय् हैगु


येँ महानगरपालिकाया आर्थिक ग्वाहालिइ पशुपति लागाया तिलगंगाय् स्वंगु मतं सि उइगु मेशिननापंया सि उइ छेँ देकेत्यंगु दु । येँ महानगरपालिका व पशुपति क्षेत्र विकास कोषदथुइ थुकिया सम्झौता पतिइ ल्हाःचिं तःगु खः । येँ महानगरपालिपाया प्रमुख विद्यासुन्दर शाक्यं गुलि फत उलि याकनं शिलान्यास याना ६ ला दुने उलेज्या याना सञ्चालन यायेगु न्ह्यथनादिल ।

येँ महानगरपालिका प्रमुख बिद्यासुन्दर शाक्य व प्रमुख प्रशासकीय अधिकृत एकनारायण अर्यालया न्ह्यःने सह–सचिव राजेश्वर ज्ञवाली व पशुपति क्षेत्र विकास कोषया छ्याञ्जे डा प्रदीप ढकालं ल्हाःचिं तःगु खः । सम्झौता कथं सि उइ छेँ देकेत कोषं सार्वजनिक सुचं तिका बोलपत्र आव्ह्वान यायेधुंकुगु व उगु बोलपत्र आः मूल्याङ्कनया झ्वलय् दूगु व न्यायेगु प्रक्रिया क्वःछिना बोलपत्रदाता ल्ययेगु, वयाँलिपा सुचं तिकेगु व ल्ययेज्या जूगु बोलपत्रदातानाप सम्झौता यायेगु व ज्या बीगु ज्या कोषं याइगु जूगु दु । 

सम्झौतापतिइ सि उइ छेँया न्ह्यःने खनेदयेक शिलापत्रय् येँ महानगरपालिकाया अनुदानय् देकुगु शवदाह गृह धका च्वइगु जूगु दु । मेयर शाक्यं आः सञ्चालन जुयाच्वंगु निगु सि उइगु मेशिनं चाप कःघाय् मफूगु इलय् महानगरपालिकाया आर्थिक ग्वाहालिइ देकीगु थप स्वंगु मेशिनं अःपुइगु अपेक्षा यानादिल । 

असोज २० गते मेयर शाक्यया नायःसुइ च्वंगु महानगरपालिकाया ५१ क्वःगु कार्यपालिका मुँज्यां पशुपति लागाय् शवदाह गृह देकेत न्ह्याकुगु प्रक्रियाय् जुइगु खर्च अनुदान बीगु निर्णय याःगु खः । येँ महानगरपालिकां आर्थिक वर्ष  २०७७/०७८ य् शवदाह गृह देकेत १५ करोड बजेट फ्याःगु दु । 

थ्व नापं शाक्यं येँ महानगरपालिकां १५ गु एम्बुलेन्स न्यायेगु प्रक्रिया न्ह्याकागु न्ह्यथनादिल । अथेहे वयेकलं स्वास्थ्य मापदण्डया पालना यायेत सकलसित इनाप यानादिल । 

थाैंकन्ह न्हिथं ३५ निसें ४५ गु सिम्ह उइगु ज्या जुयाच्वंगु दु । दूगु निगु मेशिनं न्हिथं १५–२० गु सिम्ह जक उयाच्वंगु दु । आःया मेशिनं सि उइत घाैछि निसें छघाैत्या इ कयाच्वंगुलिइ न्हूगु मेशिनं ३० निसें ४५ गु मिनेटय् सि उइगु काेषया छ्याञ्जे ढकालं न्ह्यथनादिल ।

Share on Google Plus

News: Newa News

    छ्याता
    फेसबुक छ्याता