चीनं नेपाःया भूमिइ भवन देकल धैगु बुखँ वयेधुंका नेपाल सरकार व येँया चिनियाँ दूतावासं चीनं नेपाःया भूमि अतिक्रमण मयाःगु प्रष्ट याःगु दु ।
थ्व दथुइ नाम्खा गाउँपालिका–६ लाप्चाया लोलुङजोङ लागाय् चीनं देकुगु भवनया विषयलय् हुम्लाया प्रमुख जिल्ला अधिकारी चिरिञ्जिवी गिरी नेतृत्वया पुचलं बुधबाः नेपाः चीनया ११ नंया सीमास्तभ लुइकुगु दु । थूगु सीमास्तम्भ ५८ दँ निसें तनाच्वंगु खः । सीमास्तम्भ नाम्खा गाउँपालिका ६ टाकुलेय् लूगु जिल्लाया सुरक्षा अधिकारीयात उद्धृत यासें नाम्खा गाउँपालिका अध्यक्ष विष्णुबहादुर तामाङं न्ह्यथनादीगु खः । सीमास्तम्भ सीमा प्रहरी चौकी, हिल्सास्वयाँ च्वय् ५२ स मिटर जाः च्वय् लूगु खः ।
सीमास्तम्भ लूसां चीनं देकूगु भवन सुयागु भूभागय् लाः धैगु धाये मफूगु नाम्खा गाउँपालिका अध्यक्ष विष्णुबहादुर तामाङं न्ह्यथंगु दु । लोलुङजोङय् चिनियाँ अधिकारीनाप वार्ता असफल जूगुलिं प्रजिअ गिरी नेतृत्वया पुचः हिल्सा वंगु खः ।
११ नम्बर सीमास्तम्भ तनाच्वंगुलिं नेपाः व चीनया सिमानाय् इलय् ब्यलय् विवाद वयाच्वंगु दु । नेपाली सेना, नेपाल प्रहरी, सशस्त्र प्रहरी व राष्ट्रिय अनुसन्धानया सुरक्षाकर्मीयात सिमानाय् निगु पुचः दयेका खतेयाःगु खः । स्वन्हु तक मालेधुंका तनाच्वंगु पिल्लर लूगु खः ।
0 Comments:
Post a Comment