कोरोना भाइरस कोभिड१९ या संक्रमणं मंगबाः ११ म्ह मन्त । चितवनय् ३ म्ह, येँ व पर्साय् निम्हनिम्ह व बारा, मकवानपुर, सुनसरी व सिराहया छम्हछम्ह मदुगु खः ।
भरतपुर ११, चितवनया ६५ दँ दुम्ह मिजँ मदयेधुंका कोरोना संक्रमण पुष्टि जूगु खः । ज्वरो व श्वासप्रश्वासय् समस्या वयेधुंका सोमबार भरतपुर अस्पताल भर्ना जूगु खः ।
भरतपुर ११, चितवनया १८ दँया मिसा कोरोना संक्रमण पुष्टि जूगु खः ।
खैरहनी नगरपालिका १३, चितवनया ५५ दँया मिसा नं सीधुंका कोरोना संक्रमण पुष्टि जूगु खः । वयेकःयात ज्वरो व श्वासप्रश्वासया समस्या दूगु खः ।
बाँसवारी, येँया ७० दँया मिजँ सहिद गंगालाल राष्ट्रिय मुटु केन्द्रय् मन्त । भदौ ११ गते अस्पताल भर्ना जूम्ह वयेकः १३ गते कोरोना पुष्टि जूगु खः । वयेकः उच्च रक्तचाप व मधुमेहया ल्वगि खः ।
केन्द्रीय कारागारय् बन्दी जुयाच्वंम्ह येँया ३५ दँया मिजँ मेघा अस्पताल यलय् मन्त । क्षयरोग व मानसिक समस्या दुम्ह वयेकः १२ गते अस्पताल भर्ना जूगु खःसा १४ गते कोरोना पुष्टि जूगु खः ।
वीरगञ्ज २०, पर्साया ५३ दँया मिजँ अस्थायी कोभिड अस्पताल वीरगञ्ज हेल्थ केयरय् मन्त । टाईप टु मधुमेह व जलसेँया समस्या दुम्ह वयेकः साउन ३१ गते कोरोना पुष्टि जूम्ह खः ।
नारायण अस्पतालय् मदुम्ह ६० दँया मिजँ नं संक्रमण पुष्टि जूगु दु । ज्वरो व कमजोरीया कारण १३ भदौस इमर्जेन्सीइ भर्ना याम्ह वयेकःया उपचारया झ्वलय् मृत्यु जूगु खः । वयेकःया सनाखत धाःसा मजूनि ।
कोल्हबी, बाराया ६० दँया मिजँ कोभिड अस्पताल गण्डकय् मन्त । वयेकः भदौ १० गते अस्पताल भर्ना जूम्ह खः ।
हेटौंडा १५, मकवानपुरया ५८ दँया मिजँ चितवन मेडिकल कलेज भरतपुरय् मन्त । भदौ १४ गते भर्ना जूम्ह वयेकः १५ गते कोरोना पुष्टि जूगु खः । वयेकः निमोनियाया ल्वगि खः ।
सोमबार सीम्ह धरान ११, सुनसरीया ६५ दँया मिजँ कोरोना संक्रमण पुष्टि जूगु दु । कोरोनानाप ज्वःलाःगु लक्षण खनेदूगुलिं सीधुंका स्वाब संकलन याःगु खः ।
मिर्चैया नगरपालिका ६, सिराहाया ६५ दँया मिजँ बीपी कोइराला स्वास्थ्य विज्ञान प्रतिष्ठान, धरानय् मन्त । भदौ १० गते कोरोना पुष्टि जुइधुंका अस्पताल भर्ना जूम्ह वयेकः आईसीयूलय् उपचारया झ्वलय् मन्त ।
थ्व नापं सीपिनि ल्याः २३९ थ्यंगु दु ।
0 Comments:
Post a Comment