नेपाःया जनसंख्या स्वयाँ अप्व काेराेना राेगी, ३ प्रतिशतया मृत्यु


काेराेना भाइरस काेभिड १९ या कारण हलिमय् सन्त्रास अप्वयाच्वंगु दु । थ्व ल्वय्या संक्रमण दीगु नां कयाच्वंगु मदु । छुं छुं देसं थुकिया संक्रमणयात म्हाे यायेफत तर मेगु लागाय् थुकिया प्रभाव उलिहे जुयाच्वंगु दु । युराेपय् छगु इलय् तच्वकं हायेकूगु थूगु ल्वय् थाैं कन्हे भारतय् अप्व खनेदयाच्वंगु दु । न्हिथं छगु लख हाराहारीया संक्रमण पुष्टि जुयाच्वंगु भारतय् थुकिया नियन्त्रणया नितिं माःगु कथंया व्यवस्था याःगु तकं खने मदु । थ्व हे दरं संक्रमण जुइगु खःसा भारत याकनं हे अमेरिकायात लिउ लाका दकलय् अप्व संक्रमण जूगु दे जुइत ताःलाइ ।

नेपाःया जनसंख्याया खँ ल्हायेगु खःसा फुक्कस्या म्हुतुइ ३ कराेड जनता धका वइ । खयेतला जनगणना मजुनि । ल्याः नं ३ कराेड मथ्यंनि । तर काेराेना संक्रमितया ल्याः धाःसा ३ कराेड स्वयाँ अप्व थ्यंगु दु । थाैं तक ३ कराेड ३ लख ५६ द्व ६ स व ३४ म्ह मनुतयेत काेराेना संक्रमण जुइधु‌ंकल ।

थुकि ९ लख ५० द्व ६ स व २५ म्ह मनुतय् ज्यान वंगु दु । थ्व धैगु कुल संक्रमितया ३ प्रतिशतया ज्यान काेराेना भाइरसं कयाच्वंगु दु ।

संक्रमण जूपिं मध्ये २ कराेड २० लख ४६ द्व सछि व ४४ म्ह मनु लंका छेँ लिहाँ वनेधुंकुगु दु । थ्व धयागु ७२.६ प्रतिशत खः ।

वंगु २४ घाै दुने भारतया दकलय्अप्व ९६ द्व ७ स व ९३ म्ह संक्रमित जूगु दुसा अमेरिका ४६ द्व २ स व ९५ अथेहे ब्राजिलया ३५ द्व ७ स ५७ म्ह संक्रमित जूगु दु । धलखय् अमेरिका ६८ लख ७४ द्व ५ स व ९६ म्ह संक्रमित नापं दकलय् अप्व संक्रमित दे जुयाच्वंगु दुसा भारत ५२ लख १२ द्व ६ स व ८६ म्ह संक्रमित नापं ल्यू जुयाच्वंगु दु । लियाँ ल्यू धलखय् लाःगु ब्राजिलया संक्रमिततय् ल्याः ४४ लख ५७ द्व ४ स व ४३ म्ह दुसा वयाँ लिपा रुस १० लख ८५ द्व २ स व ८१ म्ह संक्रमित दु ।

Share on Google Plus

News: Anonymous

    छ्याता
    फेसबुक छ्याता

0 Comments:

Post a Comment