नाकाय् कडाई यायेत व सार्वजनिक यातायात दिकेत रक्षामन्त्रीयात उपत्यका नगरपालिका फोरमया इनाप

उपत्यका नगरपालिका फोरमया नायः येँ महानगरपालिकाया प्रमुख विद्यासुन्दर शाक्य व फोरमया छ्याञ्जे मध्यपुर ठिमी नगरपालिकाया प्रमुख मदनसुन्दर श्रेष्ठं कोभिङ–१९ संकट व्यवस्थापन केन्द्र (सीसीएमसी)या संयोजक नापं उपप्रधानमन्त्री तथा रक्षामन्त्री ईश्वर पोखरेल नापलाना सहलह ब्याकुगु दु । 

मन्त्री पोखरेलनाप लिपांगु इलय् स्वनिगलय् अप्वःगु कोरोना संक्रमणयात नियन्त्रण यायेत व न्ह्याकेमाःगु सकारात्मक पलाः नापंया सहलह जूगु फोरमया नायः शाक्यं न्ह्यथनादिल । येँ, राजधानी तकं जूगु व घनावस्ती युक्त लागाय् कोरोना संक्रम समुदायस्तरय् थ्यनिगु खतरा दूगु अवस्थाय् थन प्रवेश याइगु नाकाय् कडाई यायेत इनाप यानागु मेयर शाक्यं न्ह्यथनादिल । मन्त्री पोखरेलं इनापयात सकारात्मक रुपं काःगु व सीसीएमसीया मुँज्यां सःता गम्भिरता नापं सहलह यायेगु प्रतिवद्धता प्वंकादीगु वयेकलया धापु दु ।

सहलहया झ्वलय् क्वारेन्टिन व्यवस्थापन व सञ्चालन नियमावली कथं एकीकृत क्वारेन्टिन संघीय सरकारं सञ्चालन यायेगु व स्थानीय तहं व्यवस्थापनय् ग्वाहालि यायेगु छ्याता  शाक्यं बियादीगु खः । स्वनिगलय् समूदायस्तरय् संक्रमण जुइफुगु खँयात ध्यानय् तया सरकारया विरोध व समर्थनय् ¥याली, भेला अनशन, जुलुसनापंया गतिविधिइ पूर्ण रोक यायेत छ्याता बियादीगु दु । जात्रा–पर्व विधिपूर्वक सामान्य रुपं न्यायेकेमाःगु व हुल मयायेत स्थानीययात इनाप याये धुनागु शाक्यं पोखरेलयात जानकारी बियादिल । 

सरकारया नियमया पालना मयाःसे यथे सुलासुला स्वनिगलय् द्वाहाँ वःगुलिं समूदायस्तरय् कोरोना संक्रमण जुइगु खतरा ब्वलंगुलिं कारवाहीया दायराय् हयेगु व्यवस्था यायेत इनाप यानादिल ।

सहलहस फोरमया सचिव श्रेष्ठं संक्रमण जुइफुगु सम्भावनायात न्युनिकरण यायेत मास्क उपयुक्त जूगुलिं अनिवार्य याना मास्क मतःपिं वा बांलाक मछ्यःपिंत कडा कारवाही यायेमाःगु छ्याता बियादिल । सार्वजनिक यातायात सञ्चालनय् वयेनापं संक्रमण दर अप्वःगुलिं ३ वा तक हाकनं दिकेत व मेगु सवारी साधनयात जोर–विजोर यायेत श्रेष्ठं इनाप यानादिल । संक्रमणया जोखिम अप्वःगु थासं दुहाँवैपिं मजदुर, कवाडी संकलक, ठेलागाडा, साईकल, फुटपाथ, तरकारी व्यापारीयात तकं स्ववा निषेध यायेत छ्याता बियादिल ।   

आर्थिक गतिविधियात चलायमान यायेत व्यापारिक लागा व सपिङ महय् मापदण्डया पूर्ण पालना याकेगु व याःमयाः स्वयेत नियमित अनुगमन यायेमाःगु छ्याता तकं वयेकलं ब्यूगु दु । सामाजिक सुरक्षा भत्ताया नविकरण यायेत ज्याथा जिथि पिहाँवयेमाःगु व संक्रमणया खतरा अप्वइगुलिं म्याद तनेत इनाप याःगु दु ।  फोरमया अध्यक्ष शाक्य, उपाध्यक्ष नापं यल महानगरपालिकाया प्रमुख चिरिबाबु महर्जन व सचिव श्रेष्ठनापंया शनिवार च्वंगु मुँज्यां थौं मन्त्री पोखरेल नापलाना छ्याता बीगु निर्णय याःगु खः ।


Share on Google Plus

News: Newa News

    छ्याता
    फेसबुक छ्याता