इजरायल व संयुक्त अरब इमिरेट्स (युएई)दथुइ सम्बन्ध सुधारया नितिं ऐतिहासिक शान्ति सम्झौता जूगु अमेरिकी राष्ट्रपति डोनाल्ड ट्रम्प ट्वीट याःगु दु ।
अमेरिकी राष्ट्रपति ट्रम्प, इजरायलया प्रधानमन्त्री बेन्जामिन नेतन्याहु व युएईया क्राउन प्रिन्स मोहमद अल नाहयानं मंका विज्ञप्ति जारी यासें ऐतिहासिक सफलतां मध्यपूर्वय् शान्ति वइगु न्ह्यथंगु दु ।
सम्झौताकथं इजरायलं वेष्ट बैंकया तधंगु हिस्सायात कायेगु योजना स्थगित याःगु दु ।
आःतक इजरायलया खाडी अरब दे नाप छुँ नं कूटनीतिक सम्बन्ध मदु । निगु दे जोर्डन व मिस्रनाप जक कूटनीतिक सम्बन्ध दूगु खः ।
इजरायलया प्रधानमन्त्री नेतन्याहुं अमेरिकी राष्ट्रपति ट्रम्पया ट्वीटयात हिब्रु भासं ‘ऐतिहासिक दिं’ कथं रिट्वीट याःगु दु ।
अमेरिकाय् युएईया राजदूत युसुफ अल ओतैबां थ्व अरब–इजरायल सम्बन्धय् महत्वपूर्ण पलाः जूगु न्ह्यथनादिल ।
सन् १९४८ स इजरायल स्वतन्त्र जुइधुंका थ्व स्वंगुगु इजरायल–अरब शान्ति सम्झौता जूगु खः । थ्व न्ह्यः मिस्रनाप १९७९ व जोर्डननाप १९९४ स सम्झौता जूगु खः ।
निगुलिं देसं मध्यपूर्वया नितिं रणनीतिक एजेण्डा दयेकेत अमेरिकाया साथ दैगु विज्ञप्तिइ च्वयातःगु दु । कूटनीतिक सम्बन्ध, आर्थिक एकीकरण व सुरक्षाया माध्यमं स्थिरता अप्वयेकेत मंका प्रतिबद्धता प्वंकुगु दु ।
0 Comments:
Post a Comment