अन्तर्राष्ट्रिय नेपालभाषा साहित्य सम्मेलन निन्हु थप, ७ गते तक जुइगु, जनकवियात नोवेल पुरष्कारया नितिं पहल याइगु

हलिं नेवाः गुथिया ग्वसालय् जुयाच्वंगु अन्तर्राष्ट्रिय नेपालभाषा साहित्य सम्मेलन भाद्र ७ गते तक जुइत्यंगु दु । सम्मेलनया झ्वलय् अप्वःगु उत्सुकता व ब्वतिकापिनिगु चापं याना निन्हु थप यायेमाःगु ग्वसाः खलकं न्ह्यथंगु दु । गुथिया ग्वसालय् वंगु भाद्र १ गते जुमय् हे वाङमय शताब्दी पुरुष सत्यमोहन जोशीं सम्मेलनया उलेज्या यानादीगु खः । सम्मेलन न्यान्हुया नितिं क्वःछिनातःगु खः ।

सम्मेलनय् ब्वतिकाःपिं नेपालभाषाया साहित्यकारपिनिगु इनाप कथं हे निन्हु थप यानागु सम्मेलनया कजि श्रीकृष्ण महर्जनं न्ह्यथनादिल । वयेकलं भाद्र ६ गते तक रचना पाठ जुइगु व ७ गते समापन जुइगु न्ह्यथनादिल । 

समापन यायेगु दिं जनकवि दुर्गालाल श्रेष्ठयात नोबेल साहित्य पुरस्कारया नितिं पहल यायेत घोषणा जुइत्यंगु दु । उकिया नितिं प्रस्तूति न्ह्यब्वयेत्यंगु दुसा दुर्गालाल श्रेष्ठया बारे विशेष ज्याझ्वः तयेत्यंगु दु । 

न्हिथं २० म्ह दे दुने व पिनेया साहित्यकारपिंसं नेपालभाषा नापं मेमेगु भाषं थःगु रचना वाचन यानाच्वंगु दुसा अनुवाद रचना तकं न्ह्यब्वयाच्वंगु दु । ज्याझ्वः जुमय् न्हिथं बहनी ५ः४५ निसें ८ बजे तक जुयाच्वंगु दु । ज्याझ्वःयात हलिं नेवाः गुथिया फेसबुक पेजय् प्रत्यक्ष प्रशारण यानाच्वंगु दु ।



Share on Google Plus

News: Newa News

    छ्याता
    फेसबुक छ्याता