स्वनिगलय् छन्हुं सित कोरोना जूपिं स्वम्ह, नेपालय् छन्हुं न्याम्ह


स्वनिगलय् कोरोना जुया छन्हुं स्वम्ह सित । यलय् निम्ह व येँय् छम्ह उपचार याकुं याकुं मदुगु खः ।

यलया किस्ट अस्पतालय् उपचार यानाच्वंम्ह कोरोना भाइरस संक्रमित सोमबार सुथः आइसियूलय् मदुगु खः । काभ्रे पाँचखालया ६८ दँया मिसा आइतबाः न्हिनय् छातीया संक्रमण व निमोनियाया उपचार याकेत अस्पताल वंगु खः ।

अथेहे येँया बानेश्वरय् च्वंम्ह ७६ दँया ज्याथा सोमबाः सुथः चाबहिलया मेडिकेयर अस्पतालय् मन्त । म्ह स्याःगु व सासः ल्हाय् थाकुसेंलि वंगु साउन २३ गते अस्पताल भर्ना जूम्ह वयेकः चिनील्वय्, निमोनिया व उच्च रक्तचाया ल्वगि खः ।

साउन २४ गते स्वाव संकलन याम्ह वयेकःया सोमबाः हे कोरोना पुष्टि जूगु खः ।

अथेहे येँया किपुलिइ ६४ दँया ज्याथा उपचारया झ्वलय् सोमबाः हे मदुगु खः । वयेकः जलसेँया दीर्घरोगी खः । निमोनिया जुया वयेकः असार ३१ गतेनिसें यलया मेडिसिटी अस्पतालय् उपचार याकाच्वंम्ह खः । वयेकः साउन ५ गते कोरोना पोजिटिभ वःगु खः ।

अथेहे वीरगञ्जया कोरोना विशेष अस्पताल, गण्डकय् उपचारया झ्वलय् आइतबाः मदुम्ह वीरगञ्ज–१५ भेडियाहीया ४५ या मिसा व शनिबार मदुम्ह धनुषाया मिथिला बिहारी नगरपालिका–५ या ४५ दँया मिजँ नं कोरोना संक्रमण पुष्टि जूगु दु ।

थ्व नापं नेपालय् कोरोनां मदुपिनि ल्याः ८१ थ्यंगु दु । स्वास्थ्य मन्त्रालयया तथ्यांकय् धनुषा व काभ्रेया अपेडट मजुगुलिं ७९ जक क्यनाच्वंगु दु ।

 

Share on Google Plus

News: Newa News

    छ्याता
    फेसबुक छ्याता