हाइड्रोक्सिक्लोरोक्विन प्रभावकारी जूगु ट्रम्पया हाकनं दाबी


अमेरिकी राष्ट्रपति डोनाल्ड ट्रम्पं हाकनं कोरोना लंकेत हाइड्रोक्सिक्लोरोक्विन वासः प्रभावकारी जूगु न्ह्यथनादिल ।
थःम्हं सिफारिस यानागुलिं हे हाइड्रोक्सिक्लोरोक्विन वासः छ्यलाबुलाय् महःगु ट्रम्पया दाबी दु । हाइड्रोक्सिक्लोरोक्विन वासः मलेरियाया ल्वगिपिंत बी । ७३ दँया ट्रम्पं दकलय् न्हापां मार्चय् कोरोना भाइरस संक्रमितया उपचारय् हाइड्रोक्सिक्लोरोक्विन वासः छ्यलेज्यूगु न्ह्यथंगु खः ।

ह्वाइट हाउसय् मंगलबाः पत्रकारलिसे खँ ल्हासें थ्व वासः प्रभावकारी जूगु व थःम्हँ नयाच्वनागु न्ह्यथनादिल ।
विश्व स्वास्थ्य संगठन (डब्ल्यूएचओ) व विश्वया मेपिं वैज्ञानिकपिंसं धाःसा कोरोनाया वासः आःतक मवःगु न्ह्यथंगु दु । हाइड्रोक्सिक्लोरोक्विन वासः थःयथे नःसा नुगःचुलय् नकारात्मक असर लाइगु ख्याच्वः तकं ब्यूगु दु ।
वंगु जुनय् अमेरिकाया फुड एण्ड ड्रग एडमिनिस्ट्रेसन (एफडीएं) हाइड्रोक्सिक्लोरोक्विन कोरोना संक्रमितया उपचारय् मछ्यलेत ख्याच्वः तकं ब्यूगु खः ।

थ्व न्ह्यः ट्रम्पं स्यानिटाइजर म्हय् इन्जेक्ट यायेगु निसें युभि रे मनुयात बीगु तकंया तर्क तःगु खः । 

नेपालय् नं प्रम केपी ओली हलु नयेगु व मुसु तया कोरोना बिस्केगु तर्क तया आलोचित जूगु खः ।

Share on Google Plus

News: Newa News

    छ्याता
    फेसबुक छ्याता