कोरोना भाइरस व लकडाउनं सिने जगतया लँ बन्द जुयाच्वंगु इलय् नेपालभाषाया हस्तिपिं खस नेपाली भाषाया संकिपा देकेत न्ह्यच्यूगु दु । थःगु न्हापांगु नेपाली सर्ट मुभि ज्वना निर्देशक सुरेश खड्गी पिलुवय् त्यंगु दु । नेपालभाषाया फिल्म लाइनय् निर्देशक, निर्माता नापं कलाकार कथं सुपरिचित खड्गीं माया, मतिनाया वान वे गथे च्वनि धका सर्ट फिल्मं क्यनेत्यंगु दु । वान साइद, टु साइद लब धका न्यनाच्वनागु इलय् वान वे धैगु छु खः ? थ्व संकिपा वय् धुंका सीदइ ।
नेपालभाषाया लोकंह्वाःपिं कलाकार व प्राविधिक छथाय् च्वना खस नेपाली लागाय् योगदान यायेत हे थ्व सर्ट फिल्म देकेत्यंगु खः । नेपालभाषा फिल्म व म्यूजिक भिडियोलय् चर्चित ख्वाः सुरज नापित व मह जोडिया मदनकृष्ण श्रेष्ठ व हरिवंश आचार्यया सुपरहिट म्येय् थःगु अदाकारीता क्यनेधुंकुम्ह नापं पुरस्कृत सर्ट फिल्मय् थःगु कला क्यनादिम्ह नायिका आराध्या लक्ष्मी खड्गीयात थूगु सर्ट फिल्मय् मू भुमिका बियातःगु दु । न्हू ख्वाः जुनु त्वायना नापं मेपिं कलाकारया अभिनय थुकि स्वयेदइ ।
निम्ह नायिका व छम्ह नायकया त्रिकोणात्मक प्रेम बाखनय् छुँ माया, छुँ विश्वासघाट, छुँ रोमान्स व यक्व हे सस्पेन्स ल्वाकज्याःगु सँकिपा हे वान वे जूगु निर्देशक खड्गीया धापु दु । थूगु चीहाकःगु संकिपाय् थः नायिका जूसां आःतक यानागु संकिपा स्वयाँ ब्यागलं भुमिकाय् खनेदइगु नेपालभाषा स्टार म्यूजिक भिडियो अवार्ड २०१९ या बेष्ट मोडल पपुलर त्याकामि तकं जुयादिम्ह नायिका खड्गीं न्ह्यथनादिल । वयेकःया मिखां मखँपिनिगु बारे जनचेतनामुलक चीहाकःगु संकिपा सरस्वती तकं तयार जुइधुंकुगु दु ।
निर्देशक खड्गी नापं नेपालभाषा संकिपा लिबाय् धुंकाया नायिका खड्गीया गुरु लिबाय् धुंकाया निर्देशक राजेशमान सिंह मू सल्लाहकार च्वनादीगु थूगु सर्ट मुभिइ सिंहया हे पटकथा दु । सर्ट फिल्मय् सुजन श्रेष्ठया बाखँ दुसा वयेकःया हे निर्माण नं खः । न्हापांगु खुसि निर्माता जुयादिम्ह श्रेष्ठ थूगु संकिपा देकेदया उत्साहित जुयादि । फिल्मय् वरिष्ठ मेकअप आर्टिष्ट सनमकुमार श्रेष्ठं ग्वाहालि यानाच्वनादिगु दु । छायाँकन अमर चित्रकारया दु ।
लकडाउन न्ह्यः हे निर्माणया योजना दूगु थूगु सर्ट मुभियात लकडाउनं प्रवेश निषेत्र धाःसां लकडाउन छ्वासुइ नापं वान वे नं थःगु लँपु मालेधुंकुगु दु ।
छ्याता
फेसबुक छ्याता