संस्कृति व म्हसिका स्यनेत येँ महानगरया दक्व ब्वनेकुथिइ स्थानीय पाठ्यक्रम


येँ महानगरपालिका क्षेत्र दुनेया दक्व संस्थागत व सामूदायिक ब्वनेकुथिइ ब्वनाच्वंपिं ब्वनामिं आः अनिवार्य १०० पूर्णाङकया स्थानीय विषयया पाठ्यक्रम अध्ययन यायेमाःगु जूगु दु । येँ महानगरपालिकां न्हापांगु खुसि थनया म्हसिका व संस्कृतिबारे जानकारी बीगु आज्जु कथं स्थानीय विषयया पाठ्यक्रम तयार याःगु दु । महानगरपालिका लागा दुनेया दक्व संस्थागत व सामूदायिक ब्वनेकुथिइ कक्षा १ निसें ८ तक पठन–पाठन याकेगु नितिं महानगरपालिकां स्थानीय विषयया पाठ्यक्रम तयार याःगु खः ।    

येँ महानगरपालिका दुने ९२ गु सामूदायिक ब्वनेकुथि मध्य ८६ गु साधारण ब्वनेकुथि, ३ गु विशेष व ३ गु बन्दीपिनिगु निति दु ।  संस्थागत ब्वनेकुथिया ल्याः ६ स व ४० गु दु । 

येँ महानगरपालिकां थःगु लागा दुने न्यायेकीगु नखःचखः, संस्कार संस्कृति, सीप कौशल, व्यवसाय, नैतिक शिक्षा, भौगोलिक प्राक् स्वरुप, स्वास्थ्य व सरसफाई, रहनसहन, व्यक्तित्व परिचय, भाषा व लिपी थेँ जाःगु विषय बारे परिचित याकेगु आज्जु नापं पाठ्यक्रम तयार याःगु दु ।

पाठ्यक्रम स्थानीय भाषा नेपालभाषाया माध्यमं पठनपाठन जुइगु महानगरपालिका पाठ्यक्रम समितिया संयोजक डा. चुन्दा वज्राचार्यं न्ह्यथनादिल । कक्षा १ निसें ८ तक नेपालभाषां ब्वंकेगु निति शिक्षा समितिं पारित यायेधुंका पाठ्यपुस्तक तयार यायेगु वयेकलं न्ह्यथनादिल ।

बज्राचार्यया कथं कक्षा १ निसें ३ तक १०० पूर्णाङ्कय् १०० हे अभ्यासगत पठन–पाठन जुइसा कक्षा ४ व ५ य् ७५ अभ्यासगत व २५ सैद्धान्तिक पठन–पाठन अथेहे कक्षा ६,७ व ८ य् ५० अभ्यासगत व ५० सैद्धान्तिक पठन–पाठन जुइ । वयेकःया कथं येँया रहनसहन व जनजीवन थनया स्थानीय भाषाय् जीवन्त जुइगुलिं पाठ्यक्रम नं स्थानीय नेपालभाषां तयार याःगु खः ।

पाठ्यक्रम समितिया दुजः वरुणप्रसाद वैद्यं पाठ्यक्रम नेपालभाषां तयार जूसां तसकं अपुक ब्वंकेफइगु न्ह्यथनादिल । ब्वनामियात अवलोकन व अभ्यासया माध्यमं ब्वंकीगु जूगुलिं  पठनपाठनय् समस्या मवइगु वयेकःया धापु दु । थ्व विषय ब्वंकेत स्यनामियात तालिम तकं बीत्यंगु दु ।

येँ महानगरपालिका शहरी योजना आयोगया दुजः गुजेश्वरी श्रेष्ठं थ्व विषय भाषा स्वयां नं येँया म्हसिकाय् केन्द्रित जूगु न्ह्यथनादिल । येँ च्वनिपिंत थनया संस्कृति, सम्पदा, रहनसहन, जनजीवन बारे परिचित याकेगु हे थुकिया आज्जु जूगु वयेकलं न्ह्यथनादिल । वयेकलं पाठ्यपुस्तकयात ग्वाहालि यायेत बहुभाषी पाठ्यसामग्रीत महानगरपालिकां प्रकाशन यायेत्यंगु न्ह्यथनादिल ।

येँ महानगरपालिका शिक्षा विभागया शाखा अधिकृत मोती भट्टराईं येँया कला, संस्कृति, सम्पदा संरक्षण यायेगु आज्जु नापं पाठ्यक्रम वैगु न्ह्यथनादिल । वयेकलं थ्व कामपाया नीतिगत निर्णय जूगु धासें सामुदायिक व नीजि ब्वनेकुथिनाप सहलह याना न्ह्याः वनेगु न्ह्यथनादिल । थुकिं येँप्रति अपनत्व अप्वयइगु वयेकःया विश्वास दु ।

स्थानीय विषय नेपालभाषाय् ब्वंकेगु महानगरपालिकाया थूगु निर्णयप्रति येँया ब्वनेकुथिया प्रधानाध्यापकपिं तकं सकारात्मक जुयाच्वंगु दु । स्वनिगलय् ब्वनामित अप्वः दूगु सामुदायिक ब्वनेकुथि ज्ञानोदय माविया प्रअ नातिकाजी महर्जनं येँया कला, संस्कृति, सम्पदा, भाषा, लिपि बारे जानकारी बीगु विषय येँ पिनं वंपिंसं अध्ययन याये दैगु ब्वनामिया नितिं बांलाःगु अवसर जूगु न्ह्यथनादिल । नोवेल एकेडमीया को–अर्डिनेटर शोभाकर भण्डारीं ब्वनेकुथिं आः नं येँया जात्रा, पर्वबारे ब्वंकाच्वनागु न्ह्यथनादिल ।

Share on Google Plus

News: Newa News

    छ्याता
    फेसबुक छ्याता