बझाङय् वंगु शुक्रबाः छम्ह ज्याथा मंत । सोमबाः कोरोना पुष्टि जुल । बझाङया प्रमुख जिल्ला अधिकारी कमलराज भण्डारीया कथं शुक्रबाः मदुम्ह बुङ्गल नगरपालिका–३ या ६५ दँया ज्याथाया कोरोना पोजिटिभ रिपोर्ट वःगु खः ।
असार २४ गते भारतया बैंग्लोरं वःम्ह वयेकः १४ न्हु क्वारेन्टिनय् च्वना साउन ६ गते छेँ लिहाँवंम्ह खः ।
क्वारेन्टिनय् च्वनाच्वंगु इलय् साउन १ गते वयेकःया उसाँय् समस्या वःगु खः । तर वयेकःया काय् नं अस्पताल यंकेम्वाःगु धासें क्वारेन्टिनय् झारफुक याःगु खः । वडाध्यक्ष कर्णबहादुर धामीं उसाँय् मभिंगुलिं सामान्य जडीबुटी नःगु न्ह्यथनादिल ।
१४ न्हु क्वारेन्टिनय् च्वना मेगु स्वास्थ्य समस्या मवःसेंलि परीक्षण मयाःसे छेँ लित छ्वःगु खः । साउन ६ गते छेँ वँम्ह ९ गते मदुगु खः ।
कोरोना परीक्षणया नितिं सिम्ह ज्याथाया स्वाब घाटय् वना संकलन याःगु खः ।
स्थानीयतयेसं परम्परागत तरिकां सिम्हेसिया अन्त्येष्टि याःगु खःसा सनाः वःपिनिगु कन्ट्रयाक्ट ट्रेसिङ याना स्वाब परीक्षणया तयारी जुयाच्वंगु दु ।
नेपाल सरकारया निति कथं १४ न्हु क्वारान्टिनय् च्वने धुंका लक्षण खने मदुसा परिक्षण हे मयाःसे छेँ वने दु ।
0 Comments:
Post a Comment