भारी वर्षाया सम्भावना, सतर्क जुइत आग्रह


वैगु स्वन्हु देशभर ह्यूपा वयेत्यंगु दु । छुं थासय् तच्वकं वा वैगु जुगुलिं सतर्क जुइत जल तथा मौसम विज्ञान विभागया मौसम पूर्वानुमान महाशाखां इनाप याःगु दु ।

महाशाखाया कथं शुक्रबाः देया यक्व धैथें थासय् नँ न्याइगु व मलः तकं वैगु पुर्वानुमान यानातःगु दु । मौसमविद गंगा नगरकोटीया कथं शुक्रबाः प्रदेश १, प्रदेश २, बागमती प्रदेश, गण्डकी प्रदेश, सुदूरपश्चिम प्रदेशया यक्व थासय् मेघगर्जन व मलः नापं भारी वर्षाया सम्भावना दु । कर्णाली प्रदेशय् धाःसा थौं भारी वर्षाया सम्भावना मदूगु मौसमविदया धापु दु ।

शुक्रबाः वा वय् नापं खुसिया लःया बहाव अप्वइगु, भूक्षय जुइगु, चलः वनीगु, सतक व हवाई यातायात प्रभावित जुइगु, धः व लःया निकास बामलाःगु थासय् डुबानतकं जुइफूगु न्ह्यथंगु दु । शुक्रबाः कन्काई, बागमती, पश्चिम राप्ती खुसिया बहाव अप्वइगु व छुँ सहायक खुसिइ सतर्कताया तहतक थ्यनीगु जुगुलिं सजग जुइत इनाप याःगु दु । नापं वैगु स्वन्हुतक कोशी, नारायणी, कर्णाली व महाकाली खुसिइ लःया बाः अप्वइ ।
स्वनिगलय् न्हिनय् निसें मनसुनी सुपाँय् खनेदया वा वैगु मौसमविदं न्ह्यथंगु दु ।

Share on Google Plus

News: Newa News

    छ्याता
    फेसबुक छ्याता