प्रहरीं १५ किलो ‘लुँ’ लुइकुगु घटना विवादय् लाःगु दु । थुकि येँ प्रहरी परिसर व महानगरीय प्रहरी वृत्त, दरबारमार्गया गम्भिर लापरबाही खनेदत ।
साढे १४ किलो वह व बागु किलो लुँ दुगु झोला कमलादीया नबिल बैंक न्ह्यःने वांछ्वया बा ६ च ५५१९ नम्बरको स्कर्पिया गाडी बिस्युवंगु येँ प्रहरी प्रमुख एसएसपी श्यामलाल ज्ञवालीं मंगलबाः पत्रकार सम्मेलन याना न्ह्यथंगु खः ।
तर, छानविन समितिं उगु लागाया क्लोज सर्किट (सीसी) क्यामरा फुटेजय् प्रहरीं धाः कथं छुं मदुगु न्ह्यथंगु दु । उगु लागाया सर्वसाधारणयात तकं घटनाबारे जानकारी मदु । बरु छुं मनुया धापु कथं घटना सुन्धाराय् जुइफुगु न्ह्यथंगु दु ।
प्रकरणया छानविनया नितिं महानगरीय प्रहरी ज्याकु, रानीपोखरीं प्रहरी वरिष्ठ उपरीक्षक (एसएसपी) मनोज यादवया नेतृत्वय् गठन याःगु समितिं अनुसन्धान अधिकृतया कमजोरी खनेदुगु प्रारम्भिक निष्कर्ष पिकाःगु दु ।
अभियुक्त र सवारीसाधन मज्वंकं पत्रकार सम्मेलन याना गाडी नम्बर सार्वजनिक याना आरोपित बिस्युवनेत मौका ब्यूगु न्ह्यथंगु दु । अथेहे सवारीसाधनया नम्बर तकं मखुगु नम्बर लूगु दु । थापाथलीया ट्राफिक प्रहरीयात ब्यूगु नं कैलालीइ दुगु यातायात व्यवस्था ज्याकुथिया रेकर्डं क्यंगु दु । गाडीबारे नाकाय् कार्यरत प्रहरी अधिकृतयात तकं लिबाक्क रिपोर्टिङ याःगु लूगु दु ।
बिस्युंवने नापं गोली कयेका गाडीयात नियन्त्रणय् फैगु जूसां प्रहरीं छाय् ध्यान मबिल धैगु रहस्यमय जूगु अधिकृतया धापु दु । येँ प्रहरी व महानगरीय प्रहरी वृत्त, दरबारमार्गया नियत खः वा लापरबाही धैगु छानविन समितिया अन्तिम प्रतिवेदनं सीदइ ।
0 Comments:
Post a Comment