त्वनेगु लःया समस्या समाधान यायेत येँ महानगरपालिका– १९ दमाईचाघाटय् ट्यांकी देकेत्यंगु दु । प्रदेश पूर्वाधार विकास साझेदारी ज्याझ्वः अन्तर्गत ट्यांकी व वाटर फिल्टर प्लान्ट देकेत्यंगु वाग्मती प्रदेशया सांसद् राजेश शाक्यं न्ह्यथनादिगु दु ।
शनिबाः रिजर्भ भ्वाएर ट्यांकी शिलान्यास यायेगु झ्वलय् सांसद शाक्यं थ्व न्ह्यथनादीगु खः । येँ क्षेत्र नं ८ या संघीय सांसद् जीवनराम श्रेष्ठ, प्रदेश सांसद राजेश शाक्य व येँ महानगरपालिका– १९ या वडाअध्यक्ष शशिलाल श्रेष्ठं मंका कथं ट्यांकी शिलान्यास यानादीगु खः ।
सांसद् शाक्यया कथं चालू आर्थिक दँय् रिर्जभ भ्वाएर ट्रंयाकी देकेत्यंगु खः । उकिया नितिं ३९ लख ७८ द्व ५ स ४३ तका खर्च अनुमान यानातःगु दु । कूल लागत मध्ये प्रदेशपाखें ३५ लख ८० द्व ६ स ८९ तका कःघायेत्यंगु दु । ल्यंगु ३ लख ९७ द्व ८ स ५४ तका जनसहभागिता पाखें मुंकेत्यंगु दु ।
फिल्टर प्लान्ट देकेत प्रदेशं वैगु आर्थिक दँया नीति व ज्याझ्वःया बजेट विनियोजित याःगु सांसद् शाक्यं न्ह्यथनादिल । सांसद् शाक्यया कथं प्रदेशं १ करोड ७५ लख बजेट फ्याःगु दु ।
थुकिं लःया हाहाकार समाधान जुइगुलि सांसद शाक्य ढुक्क जुयादिल । नापं नापसं च्वंगु वडाय् तकं लः इने फैगु न्ह्यथनादिल । थ्व वडा नापं १५, १८, १९ व २० वडाय् नं त्वनेगु लःया समस्या दु ।
२०६५ सालय् उबलय् याम्ह भौतिक आवास तथा निर्माण मन्त्री हिसिला यमीया पहलय् काठमाडौं उपत्यका खानेपानी लिमिटेड (केयुकेएलं) दमाईचाघाटय् डिप बोरिङ याःगु खः । तर बोरिङया लखय् आइरन व एमोनियाया मात्रा अप्व दूगुलिं उसाँय् बामलाइगुलिं त्वने मज्यूगु दमाईचाघाट उपभोक्ता समितिया अध्यक्ष मिलन शाहीं न्ह्यथनादिल ।
बोरिङया लः त्वने जीकेत स्थानीयतयेसँ फिल्टर प्लान्ट देकेमाःगु माग तःगु खः । फिल्टर प्लान्ट देकेत केयुकेएलया प्राविधिक पुचलं हे १ करोड २५ लाखया लागत अनुमान याःगु समितिया न्वकु तीर्थ महर्जनं कनादिल । केयुकेएलय् यक्व डेलिगेशन वँसां बजेट बिनियोजित यायेमफइगु लिसः वःगु महर्जनं न्ह्यथनादिल ।
ट्रंयाकीइ ९० द्व लिटर लः न्ह्यनि । बोरिङं प्रति सकेन्ड १५ लिटर व निघौ दुने ९० द्व लिटर लः जाइ । फिल्टर प्लान्ट देकेधुंका ५ द्व छेँ लाभान्वित जुइगु अनुमान दु ।
छ्याता
फेसबुक छ्याता