अर्घाखाँचीया शितगंगा नगरपालिकाया क्वारेन्टिनय् ४४ दँया मिजँनं आत्महत्या याःगु दुसा सुर्खेतया सिम्ता गाउँपालिका ८ या २५ दँया मिसां छेँ नापसं सिमाय् यगाना सिगु दु । निम्हसिया सिधुंका कोरोना परिक्षण याःबलय् पोजिटिभ खनेदूगु खः ।
मदुम्ह देबबहादुर विकं मंगलबाः बहनी सिमाय् यगाना सिगु खः । विकया जेठ २४ गते आरडीटी पोजेटिभ रिपोर्ट वया जेठ २५ गते पीसीआर परीक्षणया नितिं स्वाब काःगु खः । उकिया ११ न्हुलिपा रिपोर्ट पोजेटिभ वःगु खः ।
भारतया पञ्जाबं वया वयेकः क्वारेन्टिनय् च्वनाच्वंगु खः । पीसीआर रिपोर्ट मवःतले बुधबाः न्हिछि धैथें सिम्ह सिमाय् यखाना च्वंगु खःसा रिपोर्ट वयेधुंका सनिल ५ ता इलय् जक नेपाली सेनां विकया सिम्ह जंगलय् व्यवस्थापन याःगु खः ।
उखे सुर्खेटय् असार १ गते आत्महत्या याम्ह मिसाया सिम्ह पोस्टमार्टम याये न्ह्यः कोरोना परीक्षण याना स्वबलय् बुधबार संक्रमण पुष्टि जूगु दु ।
वंगु जेठ १२ गते भाःत व स्वदँया म्ह्याय् नापं भारतं वया १४ न्हु क्वारेन्टिनय् च्वंपिं इपिं आरडीटी नेगेटिभ वंसेंलि छेँ हे क्वारेन्टिनय् च्वनाच्वंगु खः ।
वयेकःया सिम्ह नं नेपाली सेनां व्यवस्थापन याइ ।
छ्याता
फेसबुक छ्याता