२८ जेठ, येँया न्यूरोड लागाया व्यापारीतयेसं चायेकुगु पसः प्रहरीं थौं नं तीकुगु दु । स्वन्हु न्ह्यः निसें चाःगु न्यूरोड लागाया पसःत म्हिगः मंगलबाः धाःसा प्रहरीं बन्द याकुगु खः ।
तर व्यापारीतयेसं थौं बुधबाः नं पसः चायेकेगु घोषणा याःगु खः । थूगु घोषणाकथं सुथः हे पसः चायेकेत वःपिं व्यापारीतयेत प्रहरीं पंगु दु । बुधबाः थें तनाव धाःसा मजू ।
नेपाल राष्ट्रिय व्यवसायी महासंघया अध्यक्ष नरेश कटुवालं लकडाउन छ्वासुकेगु नितिं थौं सरकारं निर्णय मयाःसा आन्दोलन यायेगु ख्याच्वः बियादीगु दु । वयेकलं व्यवसाय न्ह्याके मफूगु धासें आः सरकारयात ताःचा लल्हायेगु न्ह्यथनादिल । व्यापारीतयेसं २२ जेठ निसें पसल सुथः ११ बजे तक दक्व पसः चायेकेगु न्ह्यथंगु खः ।
थुखे प्रहरीं धाःसा सरकारं पसः चायेकेगु मोडालिटि महःगुलिं बन्द याकागु न्ह्यथंगु दु ।
छ्याता
फेसबुक छ्याता