कञ्चनपुरया लालझाडी गाउँपालिका–४ या पर्सियास्थित स्वतन्त्र मावि क्वारेन्टाइनं जेठ २२ य् २२ म्हसिया स्वाब संकलन यात । च्यान्हुलिपा तकं परीक्षण रिपोर्ट मवःसेंलिं शुक्रबाः छेँ लिहाँ वन । इपिंमध्ये १४ म्हसिके कोरोना संक्रमण खनेदत । क्वारेन्टाइनं छेँ वंगु निन्हुलिपा संक्रमण पुष्टि जूगु रिपोर्ट वल । शनिबाः संक्रमण पुष्टि जूपिं १५ म्ह मध्ये १४ म्ह आइतबाः सनिलतक नं माले मफुत ।
महाकाली नगरपालिका–९ या क्वारेन्टाइनं छेँ छ्वःगु निन्हुलिपा रिपोर्टय् स्वम्ह संक्रमित पुष्टि जूगु खः । शनिबाः कञ्चनपुरय् थीथी स्थानीय तहया २१ म्ह संक्रमण पुष्टि जूगु दु । व मध्ये १५ म्ह लालझाडीया खः । स्वास्थ्यकर्मीबाहेक फुक्क संक्रमित भारतं लिहाँ वःपिं खः । संक्रमित फुक्कसित होम क्वारेन्टाइनय् च्वनेत छ्वयागुलिं जोखिम मजुइगु न्ह्यथंगु दु ।
लालझाडी गाउँपालिकाया १२ गु क्वारेन्टाइनय् २ स २० म्ह च्वनाच्वंगु दु । आःतक ५ स मनुतयेत छेँ छ्वःगु दु । छुँ मनुया आरडीटी परीक्षण याःगु दुसा मेपिनि परीक्षण मयाःसे छेँ लितछ्वःगु दु ।
महाकाली नगरपालिकाय् संक्रमितनापं २६ म्हेसित २८ न्हुलिपा क्वारेन्टाइनं छेँ छ्वःगु दु । शुक्रबाः स्वाब संकलन याना १४ म्हसिया रिपोर्ट नेगेटिभ वयेधुंका मेपिनि नं नेगेटिभ वैगु आसय् छेँ छ्वःगु सीदुगु दु ।
महाकाली नगरय् आः ८ स ५० म्ह क्वारेन्टाइनय् च्वनाच्वंगु दु । आःतक २ द्व ४ स अप्वः क्वारेन्टाइनं छेँ लिहाँ वंगु दु ।
द्वःछि सछि व ५० म्हसिया स्वाब परीक्षणया लागि प्रदेशिक प्रयोगशालाय् छ्वःगुलिइ ९ स १४ म्हसिया जक रिपोर्ट वःगु दुसा ५५ म्ह संक्रमण पुष्टि जूगु दु ।
छ्याता
फेसबुक छ्याता