वा दिवस, असार १५ । नेपाः न्यंकं वा पीगु यानाच्वन । वाः पीमाःगु दिं जूगुलिं थ्व दिंयात सिनाज्या यायेगु दिं कथं वा दिवस धका न्यायेकाच्वन । धौबजि नयेगु दिं कथं न्यायेकाच्वन । तर थ्व हे दिं खोनाय् धाःसा प्रहरी वा पिके मबीगु ज्या यात । वा पीके मबीगु प्रहरीया कुतःयात प्रतिकार यासें स्थानिय किसानतयेसँ वा पिना हे त्वतूगु दु ।
थःगु बुँइ वा पीत सुयात न्यनेमाःगु धासें स्थानियतयेसँ आक्रोश प्वंकुगु दु । सिमानाय् भारतं अतिक्रमण यानाच्वंगु पनेत मवंसें सेनां नेवाःतय् बुँ अतिक्रमण यानाच्वंगु धाःसें सरकार विरुद्ध नाराबाजी तकं याःगु दु ।
येँ तराई स्वाइगु फास्ट ट्रयाक थ्व हे खोकनाया बुँ जुया देकेत्यंगु दुसा थ्व देकेत नेपाली सेनायात जिम्मा बियातःगु दु ।
लँ देकेत अतिक्रमण यानातःगु बुँया गुलिस्याँ स्थानिय तयेसँ मुआब्जा काःगु दुसा यक्वस्याँ काःगु मदुनि । मुआब्जा मकाःगु बुँइ तकं वा पिके मबियाच्वंगु ताः ई दूगुलिं थूगु दँ असार १५ लाका स्थानियतयेसँ वा पिउगु खः ।
स्थानिय तयेसँ यल महानगरपालिका वडा २० नाप समन्वय याना वा पिउगु खः । तर स्थानिय वडा प्रतिनिधि दःसां प्रहरी बलजफ्ती वा पिके मब्यूगु खः । थःपिसं बारम्बार सल्लाह यायेत ब्वनागु जूसां सिडिओ नं ई मब्यूगु व आः प्रहरी छ्वयाहया पनेत स्वःगु जनप्रतिनिधिया धापु दु ।
नेपाल प्रहरी व सशस्त्र प्रहरी बलया तःधंगु पुच तैनाथ जूगुलिं प्रहरी व किसानदथुइ घ्वातुघ्वायेगु ज्इा जुल । स्थानिय मुना प्रहरीयात पना बुँ ज्या धाःसा दिके मब्यूगु खः । सशस्त्र प्रहरीया हुलयात पनेत मिस्तयेसँ ल्हा ज्वना पंगु खःसा दक्व स्थानिय बुँइ हे द्यना विरोध याःगु खः ।
घ्वातु घ्वाना हे स्थानियतयेसँ वा पीगु ज्या क्वचायेकूगु खः । स्थानियतयेसँ बाजँ तकं हया बुँज्या याइपिंत हौसला ब्यूगु खः ।
फास्ट ट्राएकका विरोध याःसें खोनाया स्थानिय पिडित तयेसँ थ्व लँ मेथाय् यंकेत प्रशासनयात तःक्वः इनाप यायेधुंकुगु दु । स्थानियतयेसँ बुँया मुआब्जा हे मब्यूसे सेनां अतिक्रमण याःगु व मुआब्जा नं तसकं म्हो जूगु धयाच्वंगु दु । ऐतिहासिक खानाया साँस्कतिक महत्व हे म्हासे यायेगु थूगु आयोजना म्वाःगु धासें स्थानिय नेवाःतयेत विस्थापित यायेत स्वःगु धासें आक्रोश तकं पिकाःगु दु । मुआब्जा म्वाःगु व आः बुँ हे मबीगु स्थानियया अडान दु ।
ख्वनाय् जूगु वास्तविक खँ थुकथं दु :
छ्याता
फेसबुक छ्याता