छाय् यानाच्वन आरडिटि टेष्ट, २८५६ पिसिआर याना १९ संक्रमिया पुष्टि, ३७९१ आरडिटिया नतिजा ग्व ?


आइतबाः चैत ११ गते स्वास्थ्य मन्त्रालयया प्रवत्तां न्हिथं थें कोरोना अपडेट बियादिल । परिक्षणया अपडेटय् पिसिआर विधिं २४ घौ दुने २८५६ परिक्षण जूगु व १९ म्हेसिया कोरोना पुष्टि जूगु न्ह्यथनादिल । अथेहे आरडिटि परिक्षण ३७९१ जूगु धका जक जानकारी बियादिल । थुकि ग्वम्ह पोजिभि ग्वम्ह नेगेटिभ ? नेपालय् आःतक कुल ९०,०२६ आरडिटि परिक्षण जूगु दु तर थुकिया नतिजा म्हिगः जक मखु आःतक ब्यूगु मदुनि । नतिजा प्रकाशन याये मज्यूगु व भर मदुगु थूगु विधियात निरन्तरता ब्यूगुलिइ विज्ञतयेसँ आपत्ति प्वंकाच्वंगु दु ।

आरडिटि विधिं पोजिटिभ वःगु बुखँ प्रकाशन याःसा भ्रम सृजना जुइगु मन्त्रालय प्रवत्ता थम्हँ टिप्पणी यानादिगु खः । आरडिटि परिक्षण अन्तिम परिक्षण मजूगु व थुकि पोजिटिभ वयेवं आत्ते जुइ मज्यूगु वयेकलं न्ह्यथनादिगु खः । आरडिटि परिक्षणय् पोजिटिभ खनेदःपिनि पिसिआर नेगेटिभ वैगु स्वभाविक जूगु माइक्रोबाइलोजिष्टपिनिगु नं धापु दु । थ्व फल्स पोजिटिभ नं खः । व हे जुया आरडिटि पोजिटिभ जूपिनि हाकनं पिसिआर टेष्ट याइ । थुकथं निकः टेष्ट यायेमाःगु झन्झट अप्वयाच्वंगु दु ।

पिसिआर व आरडिटि टेष्टया ल्याः आकाश पाताल नं मखु । व जुया जानकारतयेसँ आरडिटि मयाःसे पिसिआरया दायरा अप्वयेकेत छ्याता बियावयाच्वंगु दु ।

विश्व स्वास्थ्य संगठनं पिसिआर विधियात आधिकारीक कथं मान्यता बियावयाच्वंगु दुसा आरडिटि विधि मयायेत इनाप तकं याःगु दु । नेपालय् आः आरडिटि नेगेटिभ जूपिं पिसिआर पोजिटिभ खनेदयाच्वंगु दुसा थुकिं खतरा झन अप्वयाच्वंगु विज्ञपिंसं चेतावनी ब्यूगु दु । यदि आरडिटि विधि धाथें भर मदुगु खःसा थुकियात निरन्तरता छाय् बियाच्वन ? यदि याय् हे माःगु खःसा थुकिया नतिजा छाय् सार्वजनिक यानामच्वन ?

Share on Google Plus

News: Anonymous

    छ्याता
    फेसबुक छ्याता