नेपालय् कोरोना संक्रमित तच्वकं अप्वइगु संकेत, देन्यंक अव्यवस्थित क्वारान्टाइन, १ लख मनुत खतराय् (विदेशीया भिडियाे अपिल स्वयादिसँ)


भारतं नेपामित धमाधम दुकायेगु ज्या जुयाच्वंगु दु । भारत थौंकन्हे कोरोनाया हटस्पट जुयाच्वंगु दुस नेपाःया नितिं कोरोनाया स्रोत । भारतं वःपिं नेपाःमिपिंत तप्यंक छेँ मछ्वःसे कोरोनाया सम्भावनां याना क्वारान्टाइनय् तयेगु यानाच्वंगु दु । तर थ्व क्वारान्टाइन विश्व स्वास्थ्य संगठनया मापडण्ड कथं कडापि मजू । थुकथं क्वारान्टाइनय् च्वंपिनि ल्याः छगु लख थ्यने धुंकुगु दु ।

क्वारान्टाइन सरकारया जुइमा वा होम क्वारान्टाइन धका छेँ हे जुइमा, संक्रमणया जोखिमं याना याकःचा तयेगु यायेमा । तर भारतं लिहाँ वःपिं मनुतयेत छगु हे क्वथाय् वन्यजन्तु कोचेयायेथें तयेगु, बस, ट्रक, ट्याक्टरय् हुलय् यायेगु ज्यां याना कोरोना संक्रमित मजुपिंत तकं खतरा जूगु दु ।

बेवास्ता व अव्यवस्थां याना क्वारान्टाइन कोरोना ल्वय् सरेयायेगु थाय् जुयाब्यूगु दु । नयेगु व त्वनेगु अभाव, च्वनेगु थासय् असुविधा व तच्वकं तांन्वःगु तराईया लकसं याना कोरोना स्वयां नं मेमेगु ल्वचं मनुतयेत महामारी जुइगु आशंका तकं यायेफु । इलय् बांलागु उपचार मदइगु व कोरोना आशंकां चिकित्सक ग्यायेमाःगु विडम्बनां याना मेमेगु सामान्य ल्वचं तकं मनुया ज्यान वनाच्वंगु दु ।

पुवंकं परिक्षण यायेगु सुविधा मदूगु व परिक्षण याना नं इलय् रिपोर्ट मवया मस्यूगु दुख सीमालाच्वंगु दु । थ्व हे जुया क्वारान्टाइनं मनुत बिस्यू वनाच्वंगु दु ।

थ्व हे झ्वलय् छम्ह विदेशीं तराईया क्वारान्टाइनया अवस्थाया बारे च्यूता प्वंका ग्वाहालिया अपिल तकं याःगु दु । भिडियो क्वय् स्वया दिसँ ।

नेपालय् प्रदेश ५ य् ३२ हजार ३ सय ७३, सुदूरपश्चिम प्रदेशय् २५ हजार ७ सय ६५, कर्णाली प्रदेशय् १७ हजार ५ म्ह क्वारेन्टिनय् च्वनाच्वंगु दु ।

अथेहे प्रदेश २ लय् १६ हजार ६ सय ७८, प्रदेश १ य् २७ सय ४७, बागमती प्रदेशय् १९ सय ५४ व गण्डकी प्रदेशय् २८ सय १४ क्वारेन्टिनय् च्वंगु स्वास्थ्य मन्त्रालयं न्ह्यथंगु दु ।



Share on Google Plus

News: Anonymous

    छ्याता
    फेसबुक छ्याता