रत्नराज्यलक्ष्मी क्याम्पस (आर.आर)य् थौंकन्हय् बि.ए. न्हापांगु दँय् अध्ययन यानाच्वंपिं ब्वनामिपिनिगु भाषा विज्ञान व नेपालभाषा साहित्य इतिहास विषयस अनलाइन कक्षा न्ह्यानाच्वंगु दु ।
लकडाउन जुइवं हे कक्षा निरन्तर रुपं न्ह्याकाः वयाच्वंगु थुगु अनलाइन कक्षा सम्भवतः देसय् लकडाउन घोषणा धुंकाः न्हापांगु खुसि न्ह्याःगु खः ।
नेपालभाषा अध्ययनरत ब्वनामिपिंसं अनलाइन कक्षापाखें थःपिन्सं प्रभावकारी रुपं आखः ब्वनेखंगु जानकारी ब्यूगु दु ।
ब्वनामि शोभा डंगोलया कथं, अनलाइन कक्षा कयाबले लकडाउनया ईया सदुपयोग जूगु दु । कलेज कक्षा काये मलाःपिं पासापिनिगु नितिं प्रभावकारी जूगु दु । त्रिभुवन विश्वविद्यालयं अनलाइन कक्षा कायेत सुचं पितबिइ न्ह्यः हे थःपिंसं लकडाउन जुइखतं शिक्षकपिंनाप समन्वय यानाः रत्नराज्यलक्ष्मी क्याम्पस बि.ए. न्हापांगु दँया नेपालभाषाया अनलाइन कक्षा संचालन यानाःगु न्ह्यथनादिल ।
कक्षा सञ्चालनया नितिं शिक्षकपिंसं अनलाइनपाखें सुथांलाक्क कक्षा कयाः वयाच्वंगुलिं तसकं बांलाःगु खँया जानकारी ब्यूगु दु ।
थुगु अनलाइन कक्षा शिक्षा मन्त्रालयं अनलाइन कक्षा कायेगु सुचं पितबी न्ह्यः हे ब्वनामिपिंसं शिक्षकपिंलिसें सहलह यानाः सुथंय् गुता इलंनिसें १०ः३० ताः ईतक न्ह्यानाः वयाच्वंगु दु ।
नेपालभाषा कक्षा अनलाइनपाखें शिक्षक अनुपसिं सुवालं भाषा विज्ञान व शिक्षिका दिपना शर्मां नेपालभाषा साहित्य इतिहासया अध्यापन यानाः वयाच्वंगु दु ।
शिक्षक अनुपसिं सुवालयाकथं, ब्वनामिपिनिगु कुतलं थ्वहे कक्षा सञ्चालन जूगु खः । संसार हे कोरोनाया महाप्रकोपया हुनिं मनूतय्सं छेँय् तुं लकडाउनय् च्वनेमाःबले अनिश्चितकालतक कक्षा सञ्चालन बन्द जूबले शिक्षण सिकाइलय् नकरात्मक लिच्वः लाइगु हुनिं न्हिथं छेँय् अथेतुं च्वनेमालीबले मानसिक तनाव जुइगुलिं थुगु कक्षा सञ्चालनपाखें लकडाउन पाखें मुक्ति व शिक्षा नं कायेखनाः च्वंगु दु । थुगु कक्षापाखें ब्वनामिपिं लाभान्वित जूगुलिं आत्मसन्तुष्टि प्राप्त जूगु दु ।
छ्याता
फेसबुक छ्याता