स्वनिगः दुहाँ वैपिंत कडाई यायेत संघीय सरकारयात येँया मेयर शाक्यया इनाप


स्वनिगलय् प्यम्ह कोरोना संक्रमित खनेदत । स्वनिगःयात रेड जोनय् तयातःगु दु । संक्रमित अप्वःगुलिं थनया जोखिम प्रमाणित जूगु येँ महानगरपालिका प्रमुख विद्यासुन्दर शाक्यं न्ह्यथनादिगु दु ।

लकडाउनया पूर्ण पालना मजूगु हुनिं जोखिमया खतरा अप्वःगु कामपा प्रमुख शाक्यं न्ह्यथनादिल ।

उपत्यका नगरपालिका फोरमं कोभिड–१९ सम्बन्धी उच्चस्तरीय समन्वय समितिया कजि उपप्रधान नापं रक्षामन्त्री ईश्वर पोखरेलयात नापलानाः स्वनिगः दुने पिने जुइपिंत कडाई यायेमाःगु माग तःगु खः । तर थुकिया कार्यान्वयन जुइमफूगु शाक्यं स्वीकार यानादिल ।

थथे जूसा संघीय सरकारं फयाँफय् मफइगु धासें स्थानीय, प्रदेश व संघीय सरकार गम्भीर जुयाः कडा कार्यान्वयन यायेमाःगु वयेकलं बः बियादिल ।

सरकारी गाडी व पासया दुरुपयोग याना स्वनिगलय् दुहांवयेगु ज्या मद्यूगु वयेकलं न्ह्यथनादिल । ताः इलंनिसें स्वनिगःबासीं लकडाउनया पूर्ण पालना यानाः ग्वाहालि याःगुलिं सुभाय् ब्यूसें अझ छुं ई धैर्य यायेत मेयर शाक्यं इनाप यानादिल ।

स्वनिगः वयेनेगुलिइ कडाइ यायेत संघीय सरकारयात वयेकलं हाकनं इनाप यानादिल ।

Share on Google Plus

News: Newa News

    छ्याता
    फेसबुक छ्याता