कोरोना संक्रमण : भारतं चीनयात लिउ लाकिन


थौंकन्हे नेपाःया नितिं तःधंगु खतरा भारत जुयाच्वंगु दु । सीमा विवादया खँ दहे दु, व बाहेक तधंगु ग्याः चिकु कोरोना संक्रमण हे खः । नेपाःया तराईया जिल्लाय् तःधंगु मात्राय् कोरोना संक्रमण लुइधुंकल । इपिं मध्ये यक्व धैथें भारतं लिहाँ वःपिं हे खः । अन्तराष्ट्रिय उडान बन्द जूगु इलय् व चीनया नाका बन्द जुयाच्वंगु इलय् कोरोना प्रकोपया दृष्टिं नेपाःया खतरा धैगु हे भारत खः । अल्याख मनुत भारतया सीमाय् नेपाः दुहाँ वयेत पियाच्वंगु न्यनेदु । गुलि मनुत खुँ लँ जुया वयाच्वंगु दु । अज्यापिं मनुतयेगु पहिचान याना क्वारान्टाइनय् छ्वयेगु जिम्मा नेपामिया ब्वलय् वःगु दु । सुरक्षाकर्मिया मिखा लाना दुहाँ वःपिंत म्हसिकेगु छगुयाँ छगु माध्यम स्थानिय जुयाब्यूगु दु । अपरिचित जुइमा वा म्हस्यूम्ह हे छाय् मजुइमा, आपुलुखुँ खने दःसा प्रहरी वा प्रशासनयात खबर याना परिक्षण व क्वारान्टाइनय् तयेकेगु हे आःया नितिं धाथेंगु उपाय जुइफु ।

थुखे कोरोनाया ग्याचिकु अप्वयाच्वंगु इलय् भारतय् धाःसा कोरोनाया राज जुयाच्वंगु दु । न्हिथं स्वद्व स्वयाँ अप्व न्हूपिं कोरोना संक्रमित लुयाच्वंगु दु । परिक्षणया मात्रा भारतय्नं अप्वयेकेमाःगु माग वयाच्वंगु हे दु । लाखौंया संख्याय् कोरोना संक्रमित जुइफूगु अनुमान यानाच्वंगु दु । गुगु अनुमान सार्थक जुयाच्वंगु नं दु । मंगलबाः न्हिछि दुने भारतय् ३,५२४ म्हेसित कोरोना पुष्टि जुल । भारतय् मुक्कं ७४,२९२ म्हेसित पुष्टि जुइधुंकुगु दुसा २,४१५ मनुतय् ज्यान वनेधुंकुगु दु । विश्वया धलखय् भारत १२ गुगु थासय् लाय् धुंकल । थ्व हे ल्याखँय् वनेगु खःसा भारतं चीनयात बुकिगु नितिं स्वन्हु हे म्वाः । ११ गुगु थासय् दूगु चीनय् मुक्कं ८२,९१९ कोरोना पिडित जूगु खःसा आः अन लगभग कोरोना नियन्त्रण यायेधुंकुगु दु । मंगलबाः छम्ह जक न्हूम्ह कोरोना पिडित चीनय् खनेदूगु खः ।

Share on Google Plus

News: Newa News

    छ्याता
    फेसबुक छ्याता