इजरायलया नितिं नेपाःया राजदूत डा.अञ्जान शाक्ययात ‘द एम्बेसडर क्लब अफ इजरायल’ पाखें सम्मानित याःगु दु । ‘द एम्बेसडर क्लब अफ इजरायल’ इजरायलया ७२ क्वःगु स्वतन्त्रता दिवसया लसताय् ग्वसाग्वःगु ज्याझ्वलय् नेपाली राजदूत डाक्टर शाक्ययात ‘एम्बेसडर अफ द इयर २०१९–२०२०’ घोषणा याःगु खः ।
९० गु देया राजदुतयात ल्यू लाकुसें उगु सम्मानं राजदूत डा.शाक्य सम्मानित जुयादीगु खः । ९० गु देया राजदूतं डा.शाक्यया पक्षय् मत ब्यूगु खः । डा.शाक्य थूगु सम्मानं सम्मानिन जुयादीम्ह एसियाली देया न्हापाम्ह राजदूत जुयादीगु दु ।
थूगु सम्मानयात नेपाः व नेपामिप्रतिया सम्मान कथं कयागु राजदूत डा. शाक्यं न्ह्यथनादिल । थूगु सम्मानं नेपाः व नेपामिया छ्यँ धस्वाकुगु धासें ग्वाहालि याःपिं ९० गु देया राजदूत, इजरायली सरकार, इजरायली जनता व अन दूपिं नेपामियात सुभाय् देछानादिल । ‘थूगु सम्मानं जित थप जिम्मेवार देकुगु दु,’ डा.शाक्यं न्ह्यथनादिल, ‘ जिगु योग्यता व क्षमतां फू कथं नेपाल–इजरायल सम्बन्ध थप प्रगाढ देकेत विशिष्ट योगदान यानावनेगु जुइ ।’
विसं.२०७५ फागुन ३ गते राजदूत नियुक्त जुयादीम्ह डा.शाक्यं राजदूतया कार्यभार कःघाना नेपाल–इजरायल सम्बन्ध थप प्रगाढ देकेत विशिष्ट योगदान यानादीगु दु ।
राजदूत डा.शाक्ययात उगु सम्मान घोषणा यायेगु ज्याझ्वलय् ‘द एम्बेसडर क्लब अफ इजरायल’ या नायः इट्जाख इल्देनं थज्यागु प्रतिकुल इलय् नं फुक्क देया राजदूतत ज्याझ्वलय् ब्वति काःगुलिं सुभाय् देछानादिल ।
छ्याता
फेसबुक छ्याता