बिहीबाः बहनी उपचारया झ्वलय् धुलिखेल अस्पतालय् मचा बुइकुम्ह मिसाया मृत्यु जूगु दु । बिहीबाः सनिल हे सिन्धुपाल्चोकया बाह्रबिसें स्वासप्रस्वासय् समस्या जूसेंलिं उपचारया नितिं धुलिखेल अस्पताल हःगु खः । २९ दँया उम्ह मिसां बैशाख २३ गते येँया महाराजगञ्जया शिक्षण अस्पतालय् मचा बुइकुगु खः । शिक्षण अस्पतालय् २४ गते डिस्चार्ज जूम्ह खःसा बाह्रबिसे थ्यनेधुंका स्वास्थ्यय् समस्या वःसेंलि धुलिखेल यंकुगु खः । वयेकःयाके कोरोनानाप ज्वःलाःगु लक्षण खनेदूगु खः । अस्पताल उच्च स्रोतया कथं राति साढे ९ बजे इमर्जेन्सीइ हःगु इलय् हे अवस्था गम्भिर जुइधुंकुगु खः । सासः ल्हाय् थाकुगुलिं भेन्टिलेटरय् तःसां वयेकःयात म्वाके मफूगु खः ।
शंकास्पद खनेदःसेंलि स्वाब कया परीक्षण याःगु खःसा थौं सुथः रिपोर्ट पोजिटिभ वःगु धुलिखेल अस्पतालया प्रवक्ता डा. सुमनराज ताम्राकारं न्ह्यथनादिल । अस्पतालय् उच्च सतर्कता तःसें न्यासः मिटरया दुरीतक प्रवेश निषेध याःगु दु । थप यकिन यायेत नमुना राष्ट्रिय जनस्वास्थ्य प्रयोगशाला नं छ्वःगु दु । आधिकारीक नतिजा कथं राष्ट्रिय जनस्वास्थ्य प्रयोगशालायात कयाच्वंगु दु ।
उखे जिल्ला विपद व्यवस्थापन समितिया संयोजक नापं प्रमुख जिल्ला अधिकारी श्रवणकुमार तिमल्सिनां संक्रमणया पुष्टी मजूनिगु व रिपोर्ट वयेधुंका जक निर्णय कायेगु न्ह्यथनादिल ।
छ्याता
फेसबुक छ्याता