इजरायलय् नेपाली राजदूत डा. अन्जान शाक्यया समन्वयय् नेपाल इजरायल चेम्बर अफ कमर्स एण्ड इन्डष्ट्रिज (एनआईसीसीआई) व इजरायल एशिया चेम्बर अफ कमर्स (आईएसीसी) दथुइ सहकार्यया सम्झौता जूगु दु ।
सम्झौताय् एनआईसीसीआईया पाखें अध्यक्ष शिशिर भट्ट व आईएसीसीपाखें उपाध्यक्ष अनात बर्नस्टेन रेचं ल्हाचिं तयादिगु खः । इजरायल एशिया चेम्बर अफ कमर्स अन्तर्गत इजरायल नेपाल चेम्बर अफ कमर्सया अध्यक्षता अनात बर्नस्टेन रेचं यानादि ।
एनआईसीसीआई व आईएसीसी दथुइ लगानी, उद्योग, यातायात, पर्यटन, प्रविधिया हस्तान्तरण, कृषि, ऊर्जा, शिक्षा व पूर्वाधार नापं थीथी आर्थिक सहकार्य बृद्धि यायेगु सम्झौता जूगु दु ।
उगु इलय् राजदूत शाक्यं दुई संस्था दथुइ जूगु सम्झौताया नितिं भिंतुना बियादिसें निगु देया आर्थिक विकासय् सहकार्य यायेत अझ सहज जुइगु न्ह्यथनादिल । उगु इलय् राजदूत शाक्यं नेपाः व इजरायलया मिसा उद्यमीया सशक्तीकरणय् ज्या यायेमाःगु खँय् जोड बियादिल ।
नेपाल इजरायल चेम्बर अफ कमर्सया अध्यक्ष शिशिर भट्टं थूगु सम्झौतां निगु देया यातायात, कृषि, पूर्वाधार, जलविद्युत, शिक्षा नापंया लागाय् द्विपक्षीय ग्वाहालि जुइगु न्ह्यथनादिल । इजरायलं नेपाःया कृषि लागाया विकास व आधुनिकीकरणय् ग्वाहालि याःगु नं न्ह्यथनादिल ।
इजरायल एशिया चेम्बर अफ कमर्सया अध्यक्ष माथन भिलनाइं निगु संस्था दथुइ जूगु सम्झौतां थवं थवय् ग्वावालिया नितिं महत्वपूर्ण भूमिका म्हितुगु न्ह्यथनादिल ।
इजरायल नेपाल चेम्बर अफ कमर्सया अध्यक्ष अनात बर्नस्टेन रेचं नेपाःया वित्तीय लागाय् सहकार्य याये दूगुलिं खुशी व्यक्त याःसें आवश्यक ग्वाहालि यायेगु न्ह्यथनादिल ।
उगु इलय् नेपाःया नितिं इजरायली राजदूत बेनी ओमेरं निगु संस्था दथुइ जूगु सम्झौताय् खुशी व्यक्त यासें नेपाः व इजरायलया आर्थिक विकासय् थप ग्वाहालि आदान प्रदान जुइगु न्ह्यथनादिल ।
भर्चुअल सम्वादं हे सम्झौतायात मुर्तरुप ब्यूगु खः ।
छ्याता
फेसबुक छ्याता