२४ घण्टाय् ५८९ पिसिआर टेष्ट जक


नेपालय् आःतक १६ द्व ८ स ९८ म्हेसिया पीसीआर प्रविधिं कोरोना संक्रमण परीक्षण याःगु दु । स्वास्थ्य तथा जनसंख्या मन्त्रालयया कथं वंगु २४ घौ दुने ५८९ म्हेसिया पीसीआर प्रविधिं परीक्षण जूगु दु । तर म्हिगः थ्व ल्याः ८१७ थ्यंगु खः ।

लिपांगु इलय् विदेशं परीक्षण किट हःगुलिं सरकारं पीसीआर परीक्षण अप्वयेकूगु दु । नापं पुल टेष्ट यायेगु न्ह्यथंगु दु । तर व कथं ल्याः धाःसा अप्वःगु खने मदु । प्रारम्भिक चरणय् जूगुलिं म्हो जूगु व याकनं परिश्रण ल्याः अप्वइगु आशा जक काये थाय् दु ।

नेपालय् आःतक कोरोना संक्रमितया ल्याः ११० दु । गुकि ७८ म्ह मिजं व ३२ म्ह मिसा खः । प्रदेश १ य् ३५, प्रदेश २ लय् ३१ व बागमती प्रदेशय् ७ म्ह संक्रमित दु । अथेहे गण्डकी प्रदेशय् २, प्रदेश ५ य् ३० व सुदूरपश्चिम प्रदेशय् ५ म्हसिके खनेदूगु खः । आःतक ३३ म्ह उपचार याना छेँ लिहाँ वंगु दुसा, ७७ म्ह थीथी अस्पतालय् उपचार यानाच्वंगु दु । वीरगञ्जय् २७, विराटनगरय् २१, बुटवलय् ६, नेपालगञ्जय् २४ व भरतपुरय् छम्हसिया उपचार जुयाच्वंगु दु ।

अथेहे येँ ३ व येँ पिने १६१ याना मुक्कं १६४ शंकास्पद मनुतयेत आइसोलेसनय् तयातःगु दु ।


Share on Google Plus

News: Newa News

    छ्याता
    फेसबुक छ्याता