क्वारान्टाइन : दैलेखय् छम्ह मचा बुल, डडेलधुराय् छम्ह मचा सित


दैलेखया पश्चिम क्षेत्रय् च्वंगु दुर्गम ठाटीकाँध गाउँपालिकाय् क्वारेन्टाइनय् च्वनाच्वंम्ह १९ दुम्ह मिसां मचा बुइकुगु दु । गाउँपालिकां वडा नं २ या पिपलचौताराय् जनता आधारभूत ब्वनेकुथिइ देकुगु क्वारेन्टिनय् शुक्रबाः च्वनाच्वंम्ह वयेकःयात ई त्यःगुलिं प्राथमिक स्वास्थ्य केन्द्र लकान्द्रय् हःगु खःसा साढे ९ बजे म्ह्याय् बूगु खः । वयेकः भात नापं जेठ १० गते भारतया कुरदुवारं वःगु खः । माँ व मचाया स्वास्थ्य सामान्य जूगु व आरडिटी रिपोर्ट नेगेटिभ वःगु स्वास्थ्य केन्द्रं न्ह्यथंगु दु ।


उखे डडेल्धुरा जिल्ला सदरमुकामया डडेलधुरा बहुमुखी क्याम्पसया क्वारेन्टाइनय् तयातःम्ह नवदुर्गा गाउँपालिका–३ या ६ दँया मिजँ मचाया धाःसा मृत्यु जूगु दु ।

मचा थः माँ बौ नापं शनिबाः चान्हय् १२ बजे जक भारतया मुम्बइनिसें डडेल्धुरा थ्यंगु खः । थ्यने साथ क्याम्पसया क्वारेन्टाइनय् तःगु खःसा मचा थच्वकं मफूगुलिं एम्बुलेन्स सःता अस्पताल यंकुगु खः । मचा अस्पतालय् थ्यं बलय् आइतबाः ३ बजे जूगु खः । चिकित्सकं मचा १२ बजे पाखे हे सीगु अनुमान याःगु दु ।

मचायाके उच्च ज्वरो दूगु व मुम्बईया अस्पतालय् मलेरियाया उपचार यानाच्वंगु छेँजःपिंसं न्ह्यथंगु दु । मचाया कोरोना परीक्षणया नितिं थ्रोट स्वाब संकलन याना छ्वःगु दु ।

Share on Google Plus

News: Newa News

    छ्याता
    फेसबुक छ्याता