येँय् आः सुथः १० ताः ई तक पसः चालिगु


सरकारं न्याक्वःगु चरणय् लकडाउन तना वैशाख २५ गतेतक यायेगु निर्णय याःगु दिं येँ महानगरपालिकां बजाःयात सहज देकेत सुथः १० ता ई तक पसः चायेकेगु निर्णय याःगु दु ।

येँ महानगरपालिकाया मेयर विद्यासुन्दर शाक्यं फुक्क वडाध्यक्षयात स्थानीय प्रहरीनाप समन्वय याना सुथ १० ता ईतक न्यायेमिये यायेगु व्यवस्था यायेत इनाप यानादिल । आइतवार ४५ क्वःगु कार्यपालिका मुँज्याय् पसः चायेके बीगु निर्णययात वडाध्यक्षतयेसं सकारात्मक रुपं काःगु दु ।

येँ महानगरपालिका प्रमुख शाक्यया नायःसुइ च्वंगु मुँज्याय् आर्थिक गतिविधियात चलायमान दयेकेमाःगु छ्याता वडाध्यक्षपिंसं ब्यूगु खः । मुँज्याय् कोरोना नियन्त्रणया नितिं वडाय् छ्वःगु बजेट, वडां याःगु ज्या, राहत वितरणया नितिं संकलित विवरण, र्यापिड डायग्नोस्टिक परीक्षण, निःशुल्क खाना व्यवस्थापन नापंया विषयलय् केन्द्रित जुया सहलह जूगु खः ।

महानगरं आःतक ६८ द्व ६ स १७ म्हसित राहत वितरण याःगु व १९ द्व ७ स २३ म्हसित वडां निःशुल्क नकेगु व्यवस्था याःगु मेयर शाक्यं न्ह्यथनादिल । अथेहे ५ स १५ म्ह मफुपिंत अस्पताल वय् वनेया नितिं संयुक्त एम्बुलेन्स चालक संघ, नेपाल (काठमाडौं जिल्ला कार्य समिति)नाप सम्झौता याना निशुल्क सेवा बियागु तकं न्ह्यथनादिल । हृदयघात, मृगौला रोगीनापां ल्वगितयेसं आकस्मिक एम्बुलेन्स सेवाया लाभ कयाच्वंगु शाक्यं न्ह्यथनादिल ।
मुँज्याय् महानगरया कोरोना संक्रमण, रोकथाम तथा नियन्त्रण कोषं तःधंगु वडा, मध्यम व चीधंगु वडायात १५ लख, १० लख  व ५ लख छसिकथं निकासा यायेगु निर्णय अनुमोदन याःगु दु ।

उकथं फोहोर व्यवस्थापनया नितिं छ्यलाच्वंगु ककनी गाउँपालिकाकाया प्रभावित वडाया राहतया नितिं प्रदान याःगु १५ लख तका व धुनिवेँसी नगरपालिकाकाया वडा १ या नितिं छ्वःगु ३ लख तका तकं अनुमोदन याःगु दु ।

Share on Google Plus

News: Newa News

    छ्याता
    फेसबुक छ्याता