प्रज्वल शाक्य
थौंकन्हे कोरोना भाइरस (कोभिड १९) या हलिंन्यंकंया संक्रमणया ल्याः स्वयेबलय् थ्व महामारी तुरुन्त क्वलाइगु ख्वाः मवः । अति विकसित दे अमेरिका, फ्रान्स, बेलायत, स्पेन, जर्मनी, चीन थें जाःगु देसं थूगु महामारीयात त्याके मफयाच्वन । चीनं सुरु जूगु थूगु महामारी आः भारतय् तच्वकं जुइगु खनेदयाच्वंगु दु । थ्व नेपाःया नितिं खतराया घण्टी जुइफु । चीनय् बुलुहुँ क्वलानाच्वंगु इलय् चीनं वम्ह मनु पाखें नेपालय् न्हापांम्ह कोरोना संक्रमण खनेदूगु जुसां वयांलिपा चीनं वःपिंके थ्व संक्रमण खनेमदु । तर भारतं वःपिं यक्व सिके थ्व संक्रमण खनेदयाच्वंगु दुसा थ्व ल्याः पक्का नं अप्व जुइतिनि । परिक्षणया दायरा अप्वयेकेगु व कोरोना संक्रमित म्हसिकेगु तसकं तःधंगु हाथ्या खः ।
निक्वःगु विश्वयुद्ध धुंकाया तःधंगु विपत्ति कथं नालाकयातःगु थूगु महामारीया नितिं नेपाःया तयारी गुलितक सन्तोशजनक ? थुकिया लिसः थ्व युद्धया न्हापांगु झ्वलय् च्वना ल्वाइपिं डाक्टरतयेसं बाहेक सुनां धाय् फइ ? कोरोनाया ग्याःचिकुं कोरोना पिडित जक मखु हलिमय् दइगु दक्व ल्वय्या ल्वगिपिंत समस्या जुयाच्वंगु दु । थ्व संक्रमण कालय् कोरोनाया ल्वगिजक दइगु पक्का नं मखु । दकलय् तःधंगु व आकस्मिक रुपं वइगु ल्वय् धैगु नुगःचुया ल्वय् खः । नुगःया समस्या जुया अस्पताल वनीगु इलय् उम्ह ल्वगि कोरोना संक्रमित जूसा ? मेगु ल्वय् जुया अस्पताल वनेमाःसा ? छु कोरोना संक्रमणया खतरा दइला ?
शहिद गंगालाल राष्ट्रिय हृदय केन्द्र व मनमोहन कार्दियो थोरासिस भ्यास्कुलर एण्ड ट्रान्सप्लान्ट सेन्टर (टिचिंग अस्पताल)या मुटुरोग चिकित्सकलिसेया खँल्हाबल्हा पाखें नेपाः कोरोनाया नितिं तयार मजूगु खनेदत । कोरोनाया ग्याचिकुया कारणं अस्पताल वैपिनि ल्याः सुन्य प्राय जुइधुंकुगु मनमोहन अस्पतालया मुटुरोग चिकित्सकं न्ह्यथनादिलसा न्हिं ४०० या ल्याय् वइपिं मुटुरोगीत थौंकन्हे स्वम्ह प्यम्ह जक जूगु गंगालालया चिकित्सकं न्ह्यथनादिल । कोरोनाया कारणं गुकथं मुटुरोगी म्हो जूगु धैगु न्ह्यसलय् निम्ह चिकित्सकया छगु हे लिसः फोन पाखें काउन्सिलिंग । अति आवश्यक मजुइकं थःपिसं स्वयाच्वनापिं मुटुरोगीपिंत अस्पताल वयेम्वायेक वयेकपिंत थुकथं फोनं हे सेवा बियावयाच्वनादीगु दु ।
ल्वय् जुलकि दकलय् न्हापां चिकित्सक क्यनेत ओपिडिइ वनीगु याइ । तर थौंकन्हे निगुलिं अस्पतालया ओपिडि सेवा ठप्प । छुं नं जुसा वनेगु धैगु इमर्जेन्सी हे खः । ओपिडि सेवा बन्द यायेज्यूला धैगु न्ह्यसलय् गंगालालया हृदय रोग चिकित्सकं डाक्टर थः हे कोरोनाया क्यारियर जुइगु सम्भावनां याना ओपिडि बन्द यायेमाःगु न्ह्यथनादिल । गंगालालय् मास्कया तकं अभाव जूगु वयेकलं न्ह्यथनादिल । सर्जिकल मास्क हे अभाव जुयाच्वंगु अस्पतालय् यदि सुं नं कोरोनाया ल्वगि वःसा मसीकं वयापाखें डाक्टरयात संक्रमण जुइगु व उम्ह डाक्टरं थःगु ओपिडिइ वइपिं ल्वगितयेत कोरोना संक्रमण यायेफूगुलिं दक्व अस्पतालय् ओपिडि सेवा बन्द यायेमाःगु न्ह्यथनादिल ।
सर्जिकल मास्क उपलब्ध जूगु तर एन९५ धाःसा मदूगु व नापनापं पिपिइ तकं उपलब्ध मयाःसे चायेकाच्वंगु इमर्जेन्सी सेवां डाक्टर जक मखु अन वइपिं ल्वगितयेगु नितिं तच्वकं जोखिमयुक्त जूगु मनमोहन अस्पतालया चिकित्सकया धाःपु दु । थःपिं न्हिथं थज्यागु जोखिमय् लाःसां सावधानी धाःसा कयाच्वनागु वयेकःया धापु दु । अनलाइन सेवाया विस्तार अस्पतालय् जूसां ल्वगितयेसं मछ्यःगु वयेकलं न्ह्यथनादिल । चिकित्सकं सामान्य ओटि ड्रेस जक फिना इमर्जेन्सी ल्वगि तयेत स्वयेगु, व नं थौंकन्हे कोरोना पिडितया ल्या अप्वयाच्वंगु इलय्, गुलि जक जोखिमपुर्ण जुइ ? थुकि सरकारं गुबलय् वाःचाइ ? नेपालय् महामारी मवयेकेगु नितिं गुबलय् व्यवस्था यायेगु ? व्यवस्थित मजुया संक्रमण अप्वयेफु । ल्वगिया ज्यान तकं वनेफु । कोरोना संक्रमणं फुक्क अस्पतालयात हे समस्याय् लाकुगु खनेदु ।
छ्याता
फेसबुक छ्याता