स्वाँया पुन्हिया फुक्क ज्याझ्वः स्थगित, छेँ हे न्यायेकेत इनाप


लुम्बिनीइ जुइगु स्वक्वःगु अन्तराष्ट्रिय बौद्ध सम्मेलन स्थगित जूगु दु । लुम्बिनी विकास कोषं बिहीबाः छगु विज्ञप्ति जारी याःसें वैशाख २५ या २५६४ क्वःगु बुद्ध जयन्ती मूल समारोह व वया निन्हु न्ह्यः न्ह्याइगु धाःगु स्वक्वःगु अन्तराष्ट्रिय बौद्ध सम्मेलनया ज्याझ्वः स्थगित जूगु न्ह्यथंगु दु ।

लकडाउनया हुनिं द्वलंद्वः ल्याखय् मनु मुंका ज्याझ्वः यायेगु अवस्था मदूगु कोषं न्ह्यथंगु दु । बुद्ध जयन्ती व अन्तराष्ट्रिय बौद्ध सम्मेलनया नितिं कोषं ४ करोड तका बजेट फ्वंगु खःस छगु करोड तका वार्षिक ज्याझ्वः अन्तर्गत स्वीकृत जुइधुंकुगु खः ।

लुम्बिनीया विहार व गुम्बाया भिक्षु भिक्षुणी, लामा गुरु, गुरुमा व अनागारिकापाखें मायादेवी देगलय् सुथः पूजाआजा याना बुद्ध जयन्ती न्यायेकेगु लुम्बिनी विकास कोषं न्ह्यथंगु दु । सामाजिक दुरी कायम याना २५६४ गु दीप प्रज्वलनया ज्याझ्वः तकं तयातःगु दु ।

कोषं बौद्धमार्गीतयेत थःथःगु थासय् सुरक्षित जुया प्रार्थना व पाठपूजा याना बुद्धजयन्ती न्यायेकेत अपिल याःगु दु । दँय् दसं बुद्ध पूर्णिमाया दिं लुम्बिनीइ द्वलंद्व मुनेगु यानावयाच्वंगु खः ।

Share on Google Plus

News: Newa News

    छ्याता
    फेसबुक छ्याता