लकडाउनया इलय् छखा छेँ छम्ह रक्तदाता अभियानं हि भण्डारनय् सुधार


कोरोना भाईरस (कोभिड १९)या हुनिं लकडाउनया इलय् हि म्हो मजुइकेत नेपाल रेडक्रस सोसाईटी महाबौद्ध उपशाखा व येँ जिल्ला शाखां मंका कथं “छखा छेँ छम्ह रक्तदाता” अभियान न्ह्याकुगु निवा क्यंगु दु ।
थूगु अभियान अन्तर्गत नेपाल रेडक्रस सोसाईटी महाबौद्ध उपशाखाया संयोजनय् ढोकाटोल येँ च्वंम्ह जेन शाहिया न्ह्यज्याय् ख्वप रक्त संचार केन्द्र (ब्लड बैंक) पाखें थौं २९ चैत्रय् हि संकलन याःगु दु । कामपा १९ वडाया ईनायटोल, ढोकाटोल, ताम्सीपाखा, नरदेवी व ढल्कोया १८ म्ह स्थानीयं हिदान याःगु दु ।

‘लकडाउनया इलय् हिया अभाव जूगु सामाजिक सञ्जालं स्यूगुलिं पासापिंत हिदानया नितिं अपिल यानागु शाहीं न्ह्यथनादिल । छेँ छेँ वना हि संकलन यानाच्वंगु जानकारी दूगुलिं थःगु छेँ नं रेडक्रस सोसाइटीया सहकर्मीपिंत सःता रक्तदान ज्याझ्वः यानागु वयेकलं न्ह्यथनादिल ।



थूगु अपिलयात सहर्ष स्वीकार याःसें स्थानीयं छेँया लागाय् हे हिदान याःगु खः । न्हापांगु खुसि हिदान याःम्ह स्वीदँ दुम्ह निरज महर्जन हिदान याना पुण्य दइगु व नियमित स्वलाय् छक हिदान फुक्कस्यां यायेमाःगु न्ह्यथनादिल ।

लकडाउनया ईलय् हिदान याना व्यक्तिगत सुरक्षाया दक्व साधन छ्यला सावधानिक रुपं हिदान सम्पन्न जूगु महाबौद्ध उपशाखाया सभापति योगेश कुमार शाहीं न्ह्यथनादिल । छेँखां छम्हया दरं नियमित हिदान याःसा आःया अभाव सामान्य जुइ ।


“छखा छेँ छम्ह रक्तदाता” अभियानं महामारीया इलय् नं व्यापकता काःगु उपशाखाया सचिव प्रकाश अमात्यं न्ह्यथनादिल । उत्साहित अमात्यं थुकियात निरन्तरता बीत उलिहे हाथ्या दूगु धाःसें हिदातायात स्वलाय् छक नियमित हिदान यायेत प्रोत्साहन जुइगु रणनिति दूगु न्ह्यथनादिल ।

आःयागु इलय् रक्तदाता छेँ छेँ हे सीमित जूगुलिं स्वास्थ्य लागाय् हिया अभाव जूगु दु । व हे जुया रेडक्रसं छेँ छेँ हि संकलन अभियानयात तीव्रता ब्यूगु दु । थ्व अभियान वंगु शुक्रवार निसें संचालन याःगु खःसा मंका कुतलं आःतक ख्वप ब्लड बैकय् १००० युनिट हि भण्डार जूगु रक्त संचार केन्द्रया प्राविधिक दामोदर नकर्मीं न्ह्यथनादिल । न्हिथं २०० युनिट हि संकलन जूसा जक स्वनिगलय् हि अभाव मजुइगु वयेकलं न्ह्यथनादिल ।

हिदान फुक्कस्यां यायेज्यूसां वासः नयाच्वंपिं, रजस्वला जुयाच्वंपिं, सुगर प्रेसरया ल्वगिपिंसं हिदान यायेमज्यू ।







Share on Google Plus

News: Newa News

    छ्याता
    फेसबुक छ्याता