नेकपा सचिवालय वैठक : वामदेव गौतम प्रधानमन्त्रीइ व माधवकुमार नेपाल स्वम्हम्ह अध्यक्षय् प्रस्ताव


प्रधानमन्त्री केपी शर्मा ओलीं बुधबाः च्वंगु पार्टी सचिवालय मुँज्याय् न्वकु वामदेव गौतमयात प्रधानमन्त्री देकेगु प्रस्ताव तयादीगु दु । अथेहे माधवकुमार नेपालयात स्वम्हम्ह अध्यक्ष देकेगु प्रस्ताव तयादीगु दु । पार्टी दुने व पिने यक्व आलोचना जूगु इलय् प्रधानमन्त्री व नेकपा अध्यक्ष पद त्वःतेत दबाब वःगु इलय् प्रम ओलीं नेकपा सचिवालय मुँज्याय् थज्याःगु प्रस्ताव तया फुक्कसित चकित यानादिल ।

थः विरुद्ध एकजुट जूपिं सचिवालयया बहुसंख्यक दुजःयात विभाजित याये कथं नापं आसन्न संकट चीकेत प्रधानमन्त्री ओलीं थूगु प्रस्ताव हयादीगु खः । गुम्ह दुजःया सचिवालयय् ओली अल्पमतय् लानाच्वंगु दु । थ्व प्रस्ताव नापं ओलीं अध्यक्ष पदं राजिनामा मबीगु मनसाय तयादीगु खः । अथेहे वामदेव गौतमयात प्रम देकेत यक्व ई काइगु जूगुलिं प्रस्ताव तःगु धापु पिहाँवःगु दु ।

मुँज्याय् दकलय् न्हापा नवाःसें पुर्वप्रधानमन्त्री नापं नेकपा अध्यक्ष प्रचण्डं प्रधानमन्त्री ओली थः हे पार्टी एकताविरोधी गतिविधिइ जुयाच्वंगु द्वपं तयादिल । थः निकट मनुतय्त जक नापलाना व माःसा पार्टी तछ्यायेगु नियत नापं ज्या याःगु द्वपं तयादिल । ओलीं राजनीतिक दल विभाजनसम्बन्धी अध्यादेश थःगु हे पार्टी तछ्यायेत हःगु प्रचण्डया द्वपं दु । उकथं हे संवैधानिक परिषद ऐन संशोधनया अध्यादेश हयाः सत्ता कब्जा यायेत स्वःगु द्वपं तयादिल । प्रचण्डं ओलीयात तप्यंक प्रधानमन्त्रीया पदं राजिनामा बीत माग यानादिल ।

थुकिया लिसलय् ओली थःगु प्रस्ताव तयादीगु खः । कोरोना महामारीया समस्या क्वचाय् धुंका अनुकूल इलय् थम्हं राजिनामा बीगु वयेकलं न्ह्यथनादिल ।

अथेहे गौतमयात प्रम देकेत राष्ट्रियसभा दुजःयात प्रधानमन्त्री जुइदइगु कथं संविधान संशोधन याना वा छुं नं निर्वाचन लागा खाली याना त्याका प्रधानमन्त्री देकेगु प्रस्ताव तयादिल । गौतम निर्वाचनय् बुम्ह खः ।

उखे वरिष्ठ नेता झलनाथ खनालं समस्या समाधानया लागि स्थायी समिति बैठक सतेत माग यानादिल । माधव नेपालं प्रधानमन्त्री ओलीयाके अहंकार खनेदूगु न्ह्यथनादिल । वयेकलं राजीनामा बिया मार्गप्रशस्त यायेत माग यानादिल ।

वामदेव गौतमं थः म्हगसय् म्हंगु थें जूगु न्ह्यथनादिल । प्रधानमन्त्रीया प्रस्ताव समर्थन यासें स्थायी समिति सःतेम्वाःगु व सचिवालय बैठकं निर्णय कायेत प्रस्ताव तयादिल ।

उपप्रधानमन्त्री ईश्वर पोखरेल व सचिवालय सदस्य विष्णु पौडेलं ओलीया प्रस्ताव समर्थन यानादिल ।
नारायणकाजी श्रेष्ठं स्थायी समितिया मुँज्या सःतेत माग तयादिल । गृहमन्त्री रामबहादुर थापां धाःसा प्रधानमन्त्रीं राजीनामा बीगु खँ व वामदेवयात प्रधानमन्त्री देकेगु प्रस्ताव ठिक मजूगु न्ह्यथनादिल ।
सचिवालय मुँज्या वैशाख २० गते हाकनं च्वनीगु कथं क्वचाःगु नेता नारायणकाजी श्रेष्ठं न्ह्यथनादिल ।

Share on Google Plus

News: Newa News

    छ्याता
    फेसबुक छ्याता