कामपा १७ वडाया लुति अजिमा देगः लागाय् च्वंगु सतःया शिलान्यास जूगु दु ।
येँ महानगरपालिका मेयर विद्यासुन्दर शाक्य नापं उपमेयर हरिप्रभा खड्गी श्रेष्ठं सतःया जग स्वनादीगु खः । इन्द्रायणी परिसर गुरुयोजना निर्माण सहयोग तथा अनुगमन उपसमितिया ग्वसालय् सिलान्यास जूगु खः ।
थःपिंसं नं छुं ज्या मयाइगु, महानगरपालिकां यानाच्वंगु ज्यायात नं आलोचना यायेत छथ्वः सम्पदाप्रेमि सक्रिय जुयाच्वंगु मेयर शाक्यं न्ह्यथनादिल । विरोध यायेगु स्वयां थःगु थासं यायेफूगु यानादीत वयेकलं इनाप यानादिल ।
बागमती प्रदेशया सांसद बसन्त मानन्धरं बिष्णुमती खुसि सफा यायेत फोहोर तप्यंक खुसिइ वांछ्वयेगु ज्या दिकेमाःगु न्ह्यथनादिल ।
उपमेयर हरिप्रभा खड्गी श्रेष्ठं थ्व फल्चा पुनर्निमाण जुइधुंका अन्तिम संस्कारया नितिं वइपिं मनूतय्त अःपुइगु न्ह्यथनादिल ।
प्रेम पुजारीया सभापतित्वय् जूगु ज्याझ्वलय् १७ वडाया वडा अध्यक्ष नविन मानन्धर, छत्रपाटी निःशुल्क चिकित्सालय (अस्पताल) या उपाध्यक्ष कुमार मानन्धर पाहाँकथं झाःगु खः ।
२०७७ सालया मंसिर तक निर्माण क्वचायेकेगु आज्जु दूगु थूगु सतःया लागत १ करोड १७ लाख ४ हजार १७९ अनुमान यानातःगु दु ।
छ्याता
फेसबुक छ्याता