हलिमय् थौं कन्हे खँल्हाबल्हा जुइगु वा बुखँ वइगु छता हे जक खँ जुयाच्वंगु दु कोरोना भाइरस वा कोभिड १९ । मंगलबाः आः तक मुक्कं च्यागु लख मनुतयेत थूगु ल्वचं कयेधुंकुगु दु । अःपुक छम्ह मनुखँ मेम्ह मनुयात थूगु ल्वचं कइगु व आःतक वासः देके मफूगुलिं विश्व हे आक्रान्त जुयाच्वंगु दु । मुक्कं ३८, ७२१ मनुत आःतक सीधुंकुगु अवस्थाय् थौंकन्हे थूगु भाइरसया मारय् अमेरिका, इटाली व स्पेन लानाच्वंगु दु ।
दकलय् अप्व प्रभावित अमेरिकाय् आः तक १० लाख मनुया परिक्षण जुइधुंकुगु दुसा छगु लख खुइन्याद्व मल्याक मनुत संक्रमित जूगु लूगु दु । न्हियां न्हिथं छगु लख मनुतयेत परिक्षण जुयाच्वंगु अमेरिकी राष्ट्रपति डोनाल्ड ट्रम्पं घोषणा यानादीगु दु । कोरोना ल्वगितय् नितिं अस्पताल नापं द्वलंद्वः भेन्टिलेटरया उत्पादन यानाच्वंगु अमेरिकां थूगु भाइरसयात याकनं निर्मुल यायेगु धयाच्वंगु दु ।
नेपाःलय् आ लकडाउन जुयाच्वंगु दु । थन आःतक न्याम्ह मनुत संक्रमित खनेदत सा लगभग १२ म्ह शंकास्पदपिंत आइसोलेसनय् तयातःगु दु । विश्व स्वास्थ्य संगठनया छ्याता कथं लकडाउन जूसां थूगु भाइरसयात बुकेत यायेमाःगु टेष्ट वा परिक्षण नेपालय् पर्याप्त जुयाच्वंगु खनेमदु । थाैं स्वास्थ्य मन्त्रालयया सुचं कथं न्हिया ६७ मनुतय् परिक्षण जुयाच्वंगु दु । म्हिगःतक ९९३ मनुया परिक्षण जूगुलिइ थाैं वया १०६० थ्यंगु दु ।
विदेशं वःपिं मनुतय् दथुइ थूगु भाइरस खनेदयाच्वंगु दुसा वयेकपिंसं थःथितिपिंत थुगु भाइरस सारेयाःगु अनुमान याःसां अज्यागु ल्वगि लुइके मफुनि । उकिनं कोरोना आशंका याना थीथी ल्वगियात लापरवाही याना सिनाच्वंगु दु । सामान्य ज्वर वया मनु सिनाच्वंगु इलय् कोरोना हे प्रमाणित जूसा ल्वचं सीसां मसीसां लापरवाहिं हे सीगु निष्चित दु ।
छ्याता
फेसबुक छ्याता