अन्तराष्ट्रिय मातृभाषा दिवसया लसताय् रत्नराज्यलक्ष्मी क्याम्पसय् वंगु फागुन ११ गते आइतवाः न्हापांगु शशी देवी हःपाः सिरपा लःल्हात । बि.ए. स्वंगुगू दँय् नेपाल भाषा कया ब्वनादिम्ह रितेश मल्लयात थूगु सिरपा लःल्हागु खः ।
वि.सं. २०७४ सालय् स्नातक तह बी.ए. न्हापांगु दँय् दक्वं विषयलय् पास जूगुलिं हःपाः सिरपाः लः ल्हाःगु खः । ज्याझ्वलय् विशेष पाहाँ कथं झायादीम्ह नेपालभाषा शिक्षा अभियानया नायः विष्णु चित्रकारपाखें ब्वनामिपिं रिदेन महर्जन, इन्द्रमान महर्जन, रितेश मल्ल, शिवराम मुनिकार, प्रशान्त डंगोल, महेश्वर श्रेष्ठ, सुरज तण्डुकार, राजेश श्रेष्ठ, कविन महर्जन, जेनिश मुनिकार, मनिष कुमार श्रेष्ठ (नेवाः), लिसें ग्वाहालि यानादीपिं स्वबियू नायः तपेन्द्र शाही लगायत न्वकू श्रीकृष्ण उप्रेतीयात हना पौलिसें भगवान बुद्धया मुर्ति लः ल्हाःगु खः ।
नेपाल भाषा शिक्षक मदनसेन बज्राचार्यं थः तिरिमय्जु मदुगु लुमन्तिलिसें नेपाल भाषाया सम्बर्धन, प्रवर्धन यायेत थुगु सिरपा निस्वना दीगु खः । हःपाः सिरपा नीद्व तका नगदया खः ।
ज्याझ्वलय् मूपाहाँ कथं डा. महेशमान श्रेष्ठपाखें हनापौ लः ल्हाःगु खः । वयेेेकलं दकले अप्वः ल्याः हयादीपिं मध्ये छम्हेसित बि.ए. न्हापांगु, लिपांगु, स्वंगुगू व प्यंगुगु दँय् दक्व बिषयलय् पास जूगु लिधंसाय् सिरपा दाँ अप्वयेका बिइगु जानकारी बियादील ।
ज्याझ्वलय् विशेष पाहाँ कथं झायादीम्ह क्याम्पस प्रमुख डा. निर्मला कुमारी सुवालं थुगुसी क्याम्पसय् ह्यूम्यान रिर्सोस म्हो जूगुलिं मास्टर्सय् नेपाल भाषा दुथ्याकेमफुगु
न्ह्यथनादिल । वइगु दँय् मास्टर्स तहलय् नेपाल भाषा दुथ्याकेगु खँय् क्याम्पस प्रशाषण सकात्मक जूगु न्ह्यथनादील ।
मूपाहाँ श्रेष्ठले थुगु अभियानय् सकृय जुयादीपिं ब्वनामिपिं व शिक्षिक पिनिगु कुतलं नेपाल भाषा कक्षा यायेफुगु धयागु छगू ऐतिहासिक लिसें महत्वपूर्ण ज्या जूगु न्ह्यथनादिल ।
वयेेकलं नेपाल भाषाया शिक्षा ख्यलय् पञ्चायतकाल सिबें नं थौंया थुगु ई बांमलाःगु काल जूगु खँ कुलादिल । उकिनं नेपालभाषाया नितिं छगू काल हे जुल धकाः नुगः खँ प्वंकादील ।
वि.सं. २०४६ सालनिसें आः तक्कं नेपाल भाषाया शैक्षिक क्षेत्रय् खासै हिलासु मवःगु ध्वाथुइकादिल ।
स्वबियू सदस्य मदन भण्डारीं ब्वनामिपिनिगु नितिं फूचाःथें ग्वाहालि यायेमखंगु खँय् दुखः प्वंकादिसें वय्कलं वइगु दिनसं नेपालभाषा ब्वनामिपिनिगु ग्वाहालि यायेत कुतः याना च्वनेगु धापू प्वंकादिल ।
ज्याझ्वलय् क्याम्पस सहायक प्रमुख गोबिन्द आचार्य, नेपाल भाषा शिक्षक डा. चन्द्र मान बज्राचार्य, शिक्षिका श्रीमिला सुवालं थःथःगु धापू प्वंकादीगु खः । ज्याझ्वलय् सभा नायः रीदेन महर्जनं अधिकारया नीति नेवाः लगायत आदिबासीतय्त जुया च्वंगु भाषिक लिसें थीथी समस्याय् राज्यपाखें विभेदय् लाकातःगु खँय् सकल छप्पं छधी जुया दनेमाःगु ई वःगु धासें थुगु अभियानया सकल भिंचितामि लिसें ग्वाहालिमिपिन्त सुभाय् देछासे ज्याझ्व क्वचायेकादीगु खः ।
छ्याता
फेसबुक छ्याता