नेपालभाषाया चीहाः संकिपा घात पाइनउड स्टुडियोजया ग्वसालय् जूगु फस्ट टाइम फिल्ममेकर सेसनय् ल्ययेज्या जूगु दु । प्रज्वल शाक्यया निर्देशन दूगु थूगु चीहाः संकिपाय् शाक्य नापं कलाकार शोभा महर्जन व सिनेम्याटोग्राफर बाबुकाजी महर्जनया मंका निर्माण खः ।
न्हापांगु ल्ययेज्या धुंका निक्वगु त्वाथः कथं भिमियोलय् भोटिंग जुयाच्वंगु निर्देशक शाक्यं न्ह्यथनादिल । थूगु संकिपा अन्तराष्ट्रिय ख्यलय् ल्ययेज्या जूगुलिं तसकं लयेताःगु कलाकार शोभा महर्जनया धापु दु । नेपालभाषा ख्यलय् तधंगु उपलब्धी जुसां भोटिंगय् सकलसिया ग्वाहालि माःगु सम्पादक तकं जुयादीम्ह बाबुकाजी महर्जनया अपिल दु । देसं दुने व पिने च्वंपिं नेपालभाषा ख्यलय् मन क्वसापिंसं थूगु भोटिंगय् ब्वति कयादीत वयेकलं इनाप तकं यानादिल ।
निसः स्वयाः अप्व संकिपाया ब्वति दूगु थूगु अन्तराष्ट्रिय फेस्टिभलय् नेपाःया स्वंगु संकिपाया ब्वति दु । उकि निगु नेपाली भासं खःसा थूगु छगुयां छगु नेपालभाषाया संकिपा ल्ययेज्या जूगु निर्देशक शाक्यं न्ह्यथनादिल ।
संकिपाय् कलाकार शोभा महर्जनया मू भुमिका दुसा वयेक नापं अनुज रत्न शाक्य, लेजिना महर्जन व बाबुकाजी महर्जनया भुमिका दु । थूगु संकिपा निक्वःगु नेपालभाषा चीहा संकिपा धेधेबल्ला कासाय् तकं ब्वति काःगु खः ।
भोटिंगय् ब्वति कायेत लिंक क्वये तयातःगु दु ।
http://vimeo.com/ondemand/ftsessionsfeb20202
छ्याता
फेसबुक छ्याता