हाइप्रोफाइल ब्ल्याकमेलया शिकार : रुपज्योति ?


जिगु मोटरसाइकल मीगु ज्या । जिथाय् ट्वाइलेट सफा याइम्हेस्यां थः म्हस्यूम्ह मनुया ध्यबा कया हल । मोटरसाइकल मिया बी धका कया हःगु ध्यबां वं मोटरसाइकल न्याना मब्यू । न व ध्यबा जित हे ब्यू । बिचय् नया बिल । आः व ध्यबा ब्यूम्ह मनुखं जित ठगे यात धका जित मुद्दा तयेगु कि ध्यबा काम्हेसित ? थःगु अधिकार हे मदुगु ज्या याना जुइम्हसिया जिम्मा कम्पनिं ला काइमखु नि ।

रुपज्योतिया थ्व धापु कथं ध्यबा काम्ह छम्ह तर थःके ध्यबा दुगु हुनिं नापं नेवाः त सोझा धका हे थुकथं थःत फसय् यायेत स्वःगु खः । अःपुक हे ध्यबा कायेफइगु धका थःत कुंगु तर थःम्ह बामलाःगु मयानागु न्ह्यथनादिल । थःके याउँक ध्यबा काये मफूगुलिं थः म्हाय्यात नं ज्वंगु व छेंया सकल जः बिरुद्ध मुद्दा दर्ता याःगु वयेकःया दाबी दु । छुं दिं न्ह्यः जक पद्म ज्योतिया नामय् तकं पक्राउ पुर्जि जारी जूगु दु ।

हाइप्रोफाइल ब्ल्याकमेलया तसकं रोचक कासा प्रहरीया संलग्नताय् हे जुयाच्वंगु खःला धैगु खँ ध्यबाः काम्ह सिई कन्स्ट्रक्सनया शम्भु फुयाँलया मुद्दा अदालतं लित काःगुलिं तप्यंक उजागर जू । अझ सरकारया हे उच्च पदस्थ नातेदारया शिकार जूगु खनेदु ।

प्रतिष्ठित उद्योगपति रुपज्योति ठगी आरोपय् पक्राउ जुल । बिगेन्द्रकृष्ण मल्लया बैना १ करोड २६ लाख नःगु द्ववपनय् रुपज्योतिया छेंजःया नामय् तकं उजुरी लाःगु दु । आः वयाः मुद्दा मिलय् यायेत २० करोड तक फ्वनाच्वंगु रुपज्योति कंसाकारं न्ह्यथनादिल । उदाय समाजया नायः तकं जुयादीम्ह देया छगु नांमुद घरानाया अरबपति व्यापारी नापं देया सम्मानित व्यक्तित्व, उकि नं पूर्व अर्थ राज्य मन्त्री थुकथं फसय् जूगु खना तिकिझ्याःया प्रज्वल शाक्य व विगेन तुलाधर चौकिहे नापलाय्त वंगु खः ।

वयेकःया बेलिबिस्तार थुकथं दु :

स्याकार कम्पनीं ल्याण्डमार्क डेभलपर्सया सेयर न्यानातःगु दु ।  जग्गाय् ल्हाः तयेत थुगु कम्पनी नाप कारोबार याःगु खः । थ्व हे ल्याण्डमार्क डेभलपर्सया जग्गाय् छें दनेत सीई कन्ष्ट्रक्सनं ठेक्का काल । सीई कन्ष्ट्रक्सनया ज्या ल्याण्डमार्कं ब्यूगु जग्गाय् छें दनेगु जक खः । शम्भु फुयाँलं थुकिया ज्या यात । थ्व झ्वलय् थुगु कम्पनीं ल्याण्डमार्क मार्फत जग्गा न्यायेमी यायेगु यात । फुयाँलं ल्याण्डमार्क डेभलपर्सया १९ नम्बर प्लट बिगेन्द्रकृष्ण मल्लयात क्यन । तर ल्याण्डमार्क मार्फत उगु जग्गा ममीगु खँ जुल । थुखे आर्थिक अभावय् लानाच्वंगु सीई कन्ष्ट्रक्सनया फुँयालं ध्यबाः थम्हं कया छ्यःगु जुयाच्वन । न्यं हे मन्यंसें मल्लया १ करोड २६ लाख कया सीई दुकाल । व हे बमोजिम भ्वँ नं यात । थुगु ध्यबा सीई कन्ष्ट्रक्सनं काःगु व ध्यबा सुरक्षित जूगु भ्वँ तकं यात । काःगु ध्यबा डेभलपर्सया लगानीकर्ता रुपज्योतियात ला छु डेभलपर्सयात तकं मब्यूसे फुँयालं छ्यल । रुपज्योतियात उगु प्लट मीगु नितिं ध्यबा कयागु जानकारी तकं मबिल । उगु जग्गा डेभलपर्सं मेम्हसित हे मियाबिल ।

थुखे स्वदँ तक ध्यबा बीधुंकुम्ह मल्लं रुपज्योतिनाप उगु जग्गा न्यायेत थम्हं १ करोड २६ लाख बियागु धासें जग्गा बीत दबाब बिल । मल्लं जग्गा वा ५ करोड बीमागु माग यात । ५ करोड मब्यूसा ठगीया मुद्दा तयेगु धम्की बिल । रुपज्योतिं थम्हँ मद्वंकागु धासें धम्कीयात गम्भीरतापूर्वक कयामदी ।

थुखे मल्लं गुण्डा निसें माओवादी कार्यकर्ता निसें थीथी पार्टिया नेतात तकं छ्यला धम्की बीगु सुरु यात । थुखे फुँयालया तकं मिलेमतो खनेदत । व हे कारणं ध्यबा काम्ह फुँयालयात त्वता तप्यंक रुपज्यातियात मल्लं धम्की बिल । थ्व हे झ्वलय् स्वंगु करोडय् रफादफा यायेगु खँ तकं तम्ह फुँयालयात मल्लं मिलेयायेगुसा थःगु भागं मिलेया धका तँम्वय् कल । मल्लयात छ्यला फुँयालं हे फाइदा कायेत स्वयाच्वंगु जकं खःला धका रुपज्योतिया शंका दु । प्रतिष्ठित नेवाःयात फसय् यायेबलय् नेवाः त छधि जुइ धका मेम्ह नेवाः छ्यःगु तकं जुइफु । थुकि सुया सुया ल्हाः दु व ला इलं उजागर याइ हे तिनि । रुपज्योति उकि ढुक्क जुयादी । थःत न्ह्याक्व सास्ती याःसां न्यायया जीत जुइगु वयेकया विश्वास दु ।

मल्लं रुपज्योति बिरुद्ध दरबारमार्ग प्रहरी बृत्तय् ठगीया उजुरी बिल । रुपज्योतिं जिल्ला अदालत यें हे वना निषेधाज्ञा माग यासें मुद्दा तयादिल । अदालतं उगु बिषय देवानी जूगु ठहर यात । थ्व कारणं मल्लया ध्यबा थम्हं का हे मकाःसां १ करोड २६ लाख ७५० तका यें  जिल्ला अदालतय् जम्मा यायेमाल । ध्यबा मल्लयात बीगु कथं जम्मा याःगु खः । थुकिया निति १० प्रतिशत कोर्ट फि कथं १ लाख २६ हजार वंगु २०७५ मंसिर १३ गते हे जम्मा यानादिल । तर, प्रमाण हे मदुम्ह मल्लं ध्यबा कायेगुला गन खः गन शक्तिया भरय् मुद्दायात अझ न्ह्यःने यकल । प्रहरीं २०७५ मंसिर १६ य् रुपज्योतिया छेँ जः विरुद्ध तकं ठगी मुद्दा दर्ता यात । अदालतं प्रहरीया मागबमोजिम पक्राउ पूर्जी जारी यात ।

थुकिया विरुद्ध सर्वोच्च अदालतय् मुद्दा दायर याःगु खःसा सर्वोच्चं रित खारेज याःगु खः । थ्व झ्वलय् रुपज्योति सिंगापुरय् दुगु खः । थः लिहाँ वःसा ज्वनीगु सिकंसिकं वयेक थःगु तालिका कथं हे नेपाः लिहाँ झाल । एयरपोर्टय् च्वनाच्वंपिं प्रहरी न्ह्यःने थः हे वना निर्दोश जूसां आत्मसमर्पन यानादिल । थःत नेपाःया कानुनय् विश्वास दूगुलिं थम्हं आत्मसमर्पन यानागु वयेकलं न्ह्यथनादिल । तर प्रहरी वयेक नापनापं वयेकःया म्हाय्यात तकं हिरासतय् काल ।
प्रतिष्ठित व्यक्तित्व जुया नं हिरासतय् च्वनेत तयार जुयादिम्ह वयेकयात उमेरया कारणं स्वास्थ्यय् समस्या मजुइमा धका अस्पतालय् चछि च्वनेत प्रहरीं छ्याता ब्यूगु खः । तर वयेकलं थः विपश्यना गुरु जुयागुलिं मखुगु खँ ल्हाये मज्यूगु व थःत अज्यागु तधंगु ल्वचं मकःगुलिं अस्पताल मवनेगु न्ह्यथनादिल । म्ह्याय् व वयेक निम्हसित हे दरबारमार्गया चौकिइ चछि तइगु जुल । तर ख्वाउँगु चौकिया क्वथां बहनी जुया वःलिसें वयेकयात स्वास्थ्यय् समस्या खनेदत । वयेकया म्ह्याय्यात तकं मुसु वैगु समस्या खनेदत । थःगु म्ह्याय्या नितिं वयेकलं अस्पतालया व्यवस्था यानाबीत प्रहरी प्रसासनयात इनाप यानादिल । न्हापा हे अस्पतालया छ्याता ब्यूगु प्रहरी प्रशासनं छुं ई लिपा यंके मफइगु खँ न्यंकल । निम्हसित चछि चौकिइ हे च्वनेमाःगु जुल । थः म्ह्याय् चछि मुसु तया ख्वाउँगु चौकिइ च्वनेमालि बलय् छम्ह बौया गुलि सास्ति जुल जुइ व ला रुपज्यातिं जक स्यू । थः छेंजःयात पिडा बिया रुपज्योतियात गलय् यायेगु मल्लया कुतः धासा ताः मलात । विपश्यना ध्यानया गुरु रुपज्यातिं थःत दुख मजूगु खँ कनादि । अन्यायया साथ बिया थः कमजोर मजुइगु तकं वयेकलं कनादिल ।

आइतबार हाकनं म्याद थप :
वंगु बिहीबार पक्राउ जुम्ह रुपज्योतियात निक्वगु खुसि म्याद थपया नितिं आइतबार यें जिल्ला अदालतय् यंकल ।
मन्द मुस्काननापं प्रहरीया गाडीं अदालत परिसरय् क्वहाँ झाल । थःत न्याय दैगुलिइ वयेक ढुक्क । तर न्यायाधीश ओमप्रसाद अर्यालया इजलाशं ज्योतियात थप न्यान्हु हिरासतय् तया अनुसन्धान यायेत उजं बिल । थःगु वकालत थःम्हं हे याम्ह रुपज्योतिं अदालतय् थःत कुने म्वाःगु १८गु कारण तकं पेश यानादिल । तर प्रहरीं अनुसन्धान यानाच्वंगु धासें वयेकयात हिरासतय् तयेगु अनुमति इजलाशं बिल ।

‘जित कुनेमाःगु छुं कारण मदु । श्रीमान, जि बिस्युँ वनीम्ह मनु मखु । बिस्युँ वनीम्ह जुसा नेपाः वयेमते धाःसां जि सिंगापुरं बिहीबार वया । विमानस्थलं ज्वना हल । थ्व मेगु छुं विषय मखु, ज्योति परिवारया इज्जतय् बलात्कार जूगु खः । जि विरुद्धला उजुरी बिल तर, जिगु छेंया मेपिं १० म्हस्यां नं ठगी यात धका धयातःगु दु । जिमि म्ह्याय्, केंहे सु छें नं पिहाँ तकं वइमखु इम्त तकं ठगीया द्वपं बियातःगु दु ।’

ज्योतिं उजुरी लाय् न्ह्यः हे विगेन्द्र कृष्ण मल्लयात बीमाःगु छगु करोड २६ लाख यें जिल्ला अदालतय् दाखिला यानागु व आःतक उगु  ध्यबा मकाःगु दाबी यानादिल । ‘जि ल्याण्डमार्फ डेभलपर्सया सञ्चालक नं मखु, थज्यागु अवस्थाय् जित गुकथं ज्वने ज्यू श्रीमान ? वयेकलं अदालतयात न्ह्यसः तयादिल ।

१८गु धलःया लिखित लिसः ज्वना वःसां न्यायाधीश ओमप्रसाद अर्यालं आःया नितिं भ्वँया अर्थ मदुगु धासें अनुसन्धानया झ्वलय् तयेत छ्याता बियादिल ।

‘छिगु खँ पायेछि जुइ तर अदालतय् वयेधुंका मुद्दाया प्रक्रिया पूवंकेमा । आःयात अनुसन्धानया नितिं न्यान्हु ई बिया । इलय् हे अनुसन्धान क्वचायेकि ।’ न्यायाधिश अर्यालं उजं बियादिल ।

रुपज्योति निर्दोश जूगु प्रमाण :

थुलिमछि खँ पिहाँवल । तर छु रुपज्योति धाथें निर्दोश हे खः ला । थुकिया प्रमाण नं वयेकयाके दु । वयेकलं बियादीगु थुगु भ्वँतय् विजयकृष्ण मल्लया ध्यबा सीई कन्ट्रक्सन याके सुरक्षित दूगु धयातःगु दु । अझ उगु ध्यबा गुबलय् धाल उबलय् बीगु धका शम्भु प्रसाद फुँयालं ल्हाचिं तकं तयातःगु दु । लुमंकेमा थ्व भ्वँ दुसां तबि रुपज्योतिं मुद्दाय् फसय् मजुइत थम्हं नं अदालतय् १ करोड २६ लाख बुझेयाये धुंकुगु दु । थः निर्दोश जूगु स्यूसां नं कानुनी झमेलाय् मलायेमा धका वयेकलं थथे ध्यबा बुझेयाःगु खः । थुगु भ्वँतय् थुकथं च्वयातःगु दु :

मिति २०७४.१२.२३
श्री विज्ञेन्द्र कृष्ण मल्लज्यू

विषय ः रकम लित कायेगु सम्बन्धय्

उपरोक्त विषयलय् छिगु थुगु सिई कन्स्ट्रक्शन प्रा.लिया परियोजना व्यवस्थापनया जिम्मा काःगु ल्याण्डमार्क डेभलपर्स प्रा.लिया बाँसबारी नांया कोलानीया प्लट नं १९ या (मिति २०७१.०२.०२ बुकिंग याःगु) छेँ जग्गा वापत छिं मिति २०७१.०५.१७ गते ल्याण्मार्क डेभलपर्स प्रा.लिइ छेँ जग्गा वापत जम्मा यायेया नितिं रु १,२६,००,७५० अक्षरुपी एक करोड छबिस लाख सात सय पचास जक थुगु कम्पनी लःल्हाःगुलिइ उगु ध्यबा डेभलपर्स प्रा.लिं प्राविधिक कठिनाइया कारणं जम्मा मजूगु व उगु जानकारी छित याकूगु व उगु ध्यबा लित कायेत छित इनाप नं पटक पटक याःगु जुसां छिं ध्यबा लित मकाःगुलिं छिगु उगु ध्यबा थुगु कम्पनीइ सुरक्षित दूगु व्यहोरा इनाप यानाच्वना । उगु ध्यबा छिं फ्वंगु इलय् लित बीगु प्रतिबद्दता व्यक्त यानाच्वना ।

शम्भु प्रसाद फुँयाल
महाप्रवन्धक
सिई कन्स्टकशन प्रा.लि

थ्व भ्वँतं प्रष्ट सी दु, रुपज्योतियात तःगु मुद्दा फर्जि खः । सुरक्षित रकम व न्ह्याबले कासां ज्यूगु व्यवस्था यानातःसां ध्यबा लित मकायेगु व ठगि मुद्दा तयेगु सुनियोजित षडयन्त्रला ख हे खत उकि नं थुगु षडयन्त्रय् प्रहरीया छ्यलाबुला तकं जूगु सीदत । थुकिं सम्मानित अदालतयात गुमराह याःगु निचोड झीसँ पिकाये फू । अदालतया अपमान थुकिं मजुइमा ।

थःत बी फक्व दुख ब्यूसां थः लिचिले मखु धासें हसमुख रुपज्योतिं थुम्सं थःत यक्व दिं कुने मफइगु न्ह्यथनादिल । थ्व मुद्दां न्याकनं न्हूगु रुप काइगु व थःगु पक्षय् वयेधुंका सुसु थूगु षडयन्त्रय् सामेल जूगु छर्लंग जुइगु वयेकलं न्ह्यथनादिल । थःम्हं म्हूगु गालय् सुसु लाइ व ला सम्मानित अदालतं याइगु अनुसन्धानं क्यनिहे तिनि । उकि नं थुगु मुद्दां गज्यागु नजीर बी ? स्वये हे मानी । दुख बीगु आज्जुं सुयातं फसय् यायेगु खःसा अपूक याये फै धैगु नजीर वनी कि सुनां फसय् यायेत स्वल वयात निदुगं सजाय जुइ धैगु नजीर जुइ । कानुनी राज्यय् न्यायया जित अवश्य जुइ ।

तिकिझ्याः वाःपाै पाखें साभार
Share on Google Plus

News: Newa News

    छ्याता
    फेसबुक छ्याता