धरहरा लागाया परम्परागत उपाकु लँपु चायेकेगु सहमति जूगु दु ।
बुधबार स्थानीय जनप्रतिनिधि, राष्ट्रिय पुनर्निर्माण प्राधिकरणया प्रतिनिधि व धरहरा निर्माण यानाच्वंगु कम्पनीया प्रतिनिधिनापया सहलहस उगु समझदारी जूगु खः ।
समझदारीकथं थुगु दँया नितिं अस्थायी लँपु देकेगु राष्ट्रिय पुनर्निर्माण प्राधिकरणं न्ह्यथंगु दु ।
उगु लँपु पुलांगु धरहरा व आः देकेत्यंगु धरहराया दथुइ लाइ ।
उपाकु जुया वनीपिं मनुत तेबहालं भोटेबहाः वनीगु लँपु पाखे पिहाँ वय् फैगु प्राधिकरणं न्ह्यथंगु दु । यें महानगरपालिका वडा नम्बर २२ या वडाध्यक्ष चिनीकाजी महर्जनं उपाकु मार्ग चायेकेगु सहमति जूगु न्ह्यथनादिल । धरहरा लागा थुगु वडाय् लाः ।
धरहरा पुनःनिर्माण स्वयाच्वंगु प्राधिकरणया विज्ञ राजुमान मानन्धरं २१ भदौतक अस्थायी लँपु तयार जुइगु न्ह्यथनादिल । उपाकु जुइपिं धर्माबलम्बी मत च्याका जुइमाःगु लँपु चायेकेगु सहमति जूगु खः ।
येंया कुन्हु भाद्र शुक्ल द्वादशीया दिनय् ल्हातय धुं, मत च्याका मदुपिनि नामय् उपाकु वनेगु चलन दु । थुगु दँ भदौ २४ गते उपाकु लाःगु दु । अथेहे, खिचापुखु–मचाध्वाखा–तेबहाः जुया तिंख्यः पिहाँवइगु अस्थायी पैदल मार्ग चायेकेगु नं न्ह्याःगु दु । सञ्चय कोष व साविकया गोश्वार हुलाकया दथुइ च्यागु फुटया अस्थायी लँपु दूगु खः ।
छ्याता
फेसबुक छ्याता