नेपालभाषा सञ्चारकमिया कुत नेपालभाषा चिहाकः संकिपा स्वचेतना थन स्वयादिसँ (Short movie)


बिधान साधारण मचा । ब्वनेगुलिइ मेपिं पासापिं स्वयां भचा अप्व हे बांला । न्ह्याबलें थें छन्हु शनिबाःया दिं सुथः न्हापां पासां म्हितेत सःतः वइ । म्हिता लिहाँ वः बलय् लजना आन्ती व माँ खँल्हानाच्वनि । लजना मस्तयेसं थःगु माँभाषा नेपालभाषां खँल्हायेमा धका धाइ । लोप जुइगु चिन्तां बिधानया दिमागय् असर लाइ ।

बिधान भाषा आयोगया हाकिम जुइ तर नं नेपालभाषा लोप जुइ । थःगु भाषा म्वाके मफया वयात जागिरं पितिनाछ्वइ ।

बिधानया बैश नं वन तर ज्याथ विधान थःगु इतिहास मालेत जुयाच्वन । नेपाःया संग्रहालय थ्यन । अन वयागु आत्मां वयात धिक्कार याइ । आत्मग्लानीं वयात तसकं ज्वनि । व सास ल्हाये फइमखु ।

माँ छँ जित इलय् हे नेपालभाषा छाय् मस्यना धका ख्वइ । विधानया मामं थनि । चाउचाउ ननं द्यंम्ह बिधान म्हगस म्हना च्वनि । माँभाय् लाेप जूगु म्हगस म्हना दँम्ह विधानं माँयाके याचना याइ । माँ जिनाप नेपालभाषा खँ ल्हाना ब्यू ।

नेपालभाषा धाथें लाेपाेन्मुख भाषा खः । थाैं कन्हेया मस्तयेसँ भाय् मल्हाये धु‌कल । थ्वया लिपाया पुस्तां खँ ल्हाय् मसइगु जक मखु मथुइगु न‌ जुइ धु‌कल । थथे भाय् त्वता वना कथं लिपाया पुस्ताय् थथे आत्मग्लानी मवइ धाय् मफु । विधान थें थः हे स्वचेतना जागृत याना भाय् मसः धका सुम्क मच्वंसें थः हे अग्रसर जुया भाय् स्यना कायेगु पलाखय् अग्रसर यायेत थुगु चिहाकःगु संकिपातं हसना बियाच्वंगु दु ।

सकल माँ व युवापिंत भाषाय् स्वचेतनाया भिंतुना देछानाच्वना ।

दछि न्ह्यः नेपालभाषा चिहाकः संकिपा धेंधेंबल्ला कासाय् दुथ्याःगु संकिपा स्वचेतना रेडियाे उपत्यका ८७‍‍.६ मेगाहर्जया नेपालभाषा प्रमुख नापं नेवा न्यूजया सञ्चालक प्रज्वल शाक्यया परिकल्पना, बाखँ नापं निर्माण व निर्देशनय् पिहाँवःगु खः । क्यामरा नापं सम्पादन फाेटाे पत्रकार अनुप प्रधानं कःघागु खः ।

भाषा म्वाकेगु अभियान कथं दयेकुगु थुगु संकिपातय् विधान तुलाधरं विधान कथं ज्या यानादीगु दुसा । तःधिकम्ह विधान कथं सञ्चारकर्मि विगेन तुलाधरं ज्या यानादीगु दु । विधान विगेनया काय् भाजु खः ।
अथेहे विधानया पासा जुयादिम्ह अद्वितिय महर्जन व तधिजुइका जुइम्ह रत्नकाजी महर्जन नं काय् बाै हे खः ।
विधानया माँ जुया म्हितादीम्ह सञ्चारकर्मि सर्मिला सुवाल जुयादी अथेहे लजना मानन्धर म्ये हालामी नापं सञ्चारकमि जुयादी ।

विगेन, सर्मिला व लजना रेडियाे उपत्यका ८७.६ मेगाहर्जया नेपालभाषा ज्याझ्वः न्ह्याकामी जुयादी । अथेहे रत्नकाजी मन तिकिझ्या वाःपाैया सम्पादक नापं नेवाः टिभी लिसे आवद्ध जुयादी ।

नेपालभाषा जागरणय् नेपालभाषा सञ्चारकमिया छगु पला कथं थुगु संकिपायात काय् फइ ।

Share on Google Plus

News: Newa News

    छ्याता
    फेसबुक छ्याता