वंगु नाग पञ्चमीया दिं, सोमबार, येँया बागबजार स्थित होटल हार्दिकय् साहित्यिक व सांगीतिक क्षेत्रया नां जाःपिं व्यक्तित्वपिनिगु गौरवमय समुपस्थितिइ हनेबःहम्ह गायक, संगीतकार एवं गीतकार योगेश वैद्यया जन्मदिं कुन्हु वयेकया शब्द रचना व संगीत निर्देशनय् संवेदनात्मक गायकिया लागिं च्वछाय् बःहम्ह म्ये हालामि रिता महर्जनया याकः सः दुथ्याःगु म्येचाः “यो साँझको मधुरिम छटामा” पितब्वज्या जूगु दु । उगु ज्याझ्वलय् म्ये हालामि नापं कवि महर्जनया अतिकं मार्मिक चिनाखँ मुना सफू “अन्तः मनया मौन अभिव्यक्ति” पितब्वज्याः जूगु दु । ज्याझ्वःलय् सभापतिया आसनय् नेपाली गीत संगीतया लागाय् अति हे प्रतिस्थित कवि व गीतकार रत्न शमशेर थापा च्वनादीगु खः । नेपाःया अतिकं लोकं ह्वाःपिं व थःगु क्षेत्रय् तसकं सम्मानित संगीत साहित्यया अतिकं हनेबहःपिं, गीतकार नापं संकिपा निर्देशक यादव खरेल, वरिष्ठ गीतकार किरण खरेल, वरिष्ठ गायक व संगीतकार प्रेमध्वज प्रधान व वरिष्ठ संगीत निर्देशक व गायक शम्भूजीत बास्कोटा नापनापं नेपालभाषाया वरिष्ठ कवि नारायण देवी श्रेष्ठ पाखें निगुलिं कृतिया मंका पितब्वज्या जूगु खः । ज्याझ्वलय् पितब्यूगु गीति संग्रह दुने दुथ्याःगु निपु म्येया म्यूजिक भिडियो तकं सार्वजनिक जूगु दु । ज्याझ्वलय् महर्जनं च्वयादीगु सफूया चिनाखँ तकं न्यंकादीगु खः । सीता स्मृति किपूया ग्वसालय् थुगु कृति पितब्यूगु खः । थ्व निक्वःगु कुतः खः ।
उगू समारोहस नेपाया संगीत क्षेत्रय् सितारवादन यात उच्च स्थानय् थ्यंकेगु कुतलय् राष्ट्रिय तथा अन्तराष्ट्रिय क्षेत्रय् थःगु तःजिगु तपस्या व सेवाय् समर्पित जुयाच्वनादीम्ह वरिष्ठ संगीत साधक सितार उस्ताद तारावीर सिं तुलाधर यात विशेष हनेगु ज्या जूगु दु ।
नुगः खँ तयेगु झ्वलय् गीतकार यादव खरेलं सी.डीइ दुथ्यागु म्येया उच्च मूल्याङ्कन यानादिल । म्येया साहित्यिक पक्षया नापनापं सांगीतिक स्तर नं उच्च जूगु वयकलं न्ह्यथनादिल । थौं कन्हेया श्रोता तय्सं उलि अःपुक कायेगु मयासां थुजोगु म्येया जीवन ताहाः जुइगु दाबी वय्कलं यानादिल ।
वरिष्ठ गायक प्रेमध्वज प्रधानं संगीतकार तथा गीतकार योगेश वैद्य व म्ये हालामि महर्जनया कुतः सार्थक व सफल जूगु बिचाः प्वंकादिसें निम्हं सर्जकपिन्त भिन्तुना देछानादिल ।
संगीतकार शम्भूजीत बास्कोटां म्येचाकय् दुथ्याःगु म्येतः हानं हानं न्यना थःत सन् १९५०÷६० ताकाया संगीतया स्वर्णीम यूगया सुमधुर म्ये लुमंगु न्ह्यथनादिल । आयागु ह्रासोन्मुख सांगीतिक स्तर व स्थितियात झंकृत याना बी फत धाःसा झीगु संगीतया मौलिक माधुर्यता पुनरावृत जुईगु वयेकलं आश यानादिल ।
उगु हे झ्वलय् वरिष्ठ गीतकार किरण खरेलं म्ये न्यनाः थः अतिकं प्रभावित जूगु खँ प्वंकादिल । रिता छम्ह साहित्यिक व्यक्तित्व जुयालिं म्येया सूक्ष्म व संवेदनशील भावयात दुनुगलंनिसें आत्मसात यायेपूmगु वयेकलं न्हयनादिल । वय्कःया सुमधुर सःया निखार म्येया प्रत्येक हरफय् सबल, सशक्त व सुन्दरतम रुपय् प्रकट जूगु कनादिसें म्येया भावात्मक पक्षयात अतिकं च्वछानादिल ।
सभापतिया आसनय् च्वनादीम्ह वरिष्ठ कवि नापं गीतकार रत्न शमशेर थापां सभापतित्व ग्रहण यायेगु सुअवसरं थः अति हे सम्मानित जूगु महसूश यानागु न्ह्यथनादिल । समारोहया विशेषता हे साहित्यिक व सांगीतिक माहौलय् सभ्य व शिष्ट संचालन जूगु व सुपरिचित उपस्थित जनया पारिवारिक लकस जुयाः नं थः अति लय्ताःगु कनादिल ।
अस्वस्थताया कारणं थ्यंकेमफुम्ह वरिष्ठ समालोचक ईन्द्र मालीं महर्जनया चिनाखँ मुना बारे भावविह्वल उद्गार भिडियो पाखें आशिर्वचन व्यक्त यानादिल ।
अथेहे अभिनन्दित तारावीर सिं तुलाधरं भावुक जुया थःम्ह न्ह्याबलें ययेकाच्वनापिं साहित्यिक व सांगीतिक हस्ति तयेपाखें सम्मानित जुइ दूगु थःगु जीवनया तःधंगु लसता जूगु न्ह्यथनादिल ।
उकथं सम्मानित कवि नारायण देवी श्रेष्ठं थः मफूसां रिताया साहित्य व संगीतया निस्वार्थ सेवा, मदिक न्ह्यानाच्वगु लगन, संवेदनशील व शिष्ट व्यक्तित्वया सद्भावं सालाः थ्यंकेफुगु न्ह्यथनादिल । चिनाखँ मुनां थःत तसकं मार्मिक व भावपूर्ण दयेकुगु व थुकि जीवन दर्शनया मनन याये बहःगु अभिव्यक्ति ब्यूगु न्ह्यथनादिल ।
पितब्वःज्या धुंका वरिष्ठ संगीत सर्जक व साहित्यिक व्यक्तित्व योगेश वैद्यया बूदिं भिन्तुना देछा ज्याझ्वः न्ह्याःगु खः । भिन्तुना देछायेगु झ्वलय् ग्वसाखलःपाखें मंगल कामना पौ देछात नापं जनकवि दुर्गालाल श्रेष्ठया बूदिंया भिन्तुना चिनाखँ लःल्हात । छसिकथं उपस्थित व्यक्तित्व पाखें भिन्तुना देछागु खः ।
पारिवारिक स्तरय् परम्परागत रुपय् हनाच्वनागु व सार्वजनिक समारोहसं जन्मन्हि जनस्तरय् हने दयाः थः तसकं लय्ताःगु वैद्यं न्ह्यथनादिल । वय्कलं निदंया कुतलं म्येचा पुवंगु व निर्माणया झ्वलय् भोगे यायेमाःगु अवरोध व कष्टया खँ ब्याकादिया प्रत्येक म्येया रेकर्डिङ्क पूर्व यायेमाःगु अभ्यासया बारे थःगु खँ तयादिल ।
ज्याझ्वःया अन्तिम चरणय् म्येचाः निर्माणय् ग्वाहालि यानादीपिं कलाकार, प्राविधिज्ञ सकलसित मतिनाया चिं लःल्हागु खः । ग्वसाः खलः सीता स्मृति संगीत किपूया सचिव निता रंजितं सुभाय् देछाना क्वचागु ज्याझ्वः सुप्रसिद्ध वरिष्ठ कवि प्रतिसरा साय्मिं न्ह्याकादीगु खः ।
छ्याता
फेसबुक छ्याता